阿碌開咪｜快發掘多幾個「佳叔」

周日睇電視新聞，旁邊傳出有人大嗌：「喂，又係劉兆佳？」

呢句說話代表乜呢？字面已解釋——又係佳叔？佢正在評論第十三屆全國人大五次會議中，領導人講話內容所發放的訊息也。

北京領導人有一套「官話」，字字珠璣，句句精準。但單聽字面，普通人，尤其香港人，極難即時領會涵義。就算採訪的記者，多因年紀輕、經驗淺，也未能有充分掌握。於是，就要搵「人肉解碼器」了。

先唔講佳叔，講講家喻戶曉的「小明」李家仁醫生。李醫生乃百分之一千的「傳媒好朋友」。點解？因佢絕對有求必應。凡電視、電台、報章、雜誌、新聞、副刊……有要求，一律冇托手踭。需要時，更可先放下診務，專誠到電視台及電台接受訪問，解釋醫學常識。

李醫生乃兒科聖手，起初記者凡有任何與兒童疾病問題，就搵佢，次次得到詳盡清晰答案，反應熱誠專業。發展下去，記者有任何醫學常識問題，個腦必定「叮」一聲諗起李家仁。於是，又撥電話畀佢，次次必得到快速回應。

如此，你係記者，日日要趕片趕稿出街，會點？當然發展落去，變成「事事問李家仁」。

有次我行經電台新聞部，聽見老總訓示記者：「唔好喇啩，又係李家仁？你咪害佢啦！」

老總講出兩個事實：一、記者太懶，唔預早做工夫，多點發掘不同專科醫生，先打關係，遇事立即請教，導致「乜都李家仁」；二、大家都錫李家仁，也有責任保護佢不過分曝光，影響權威性。應該適當時才出現，咁先「長玩長有」也。

同理，佳叔也如是。記者有任何關於中央問題，個個又係可能懶到出汁，攞起電話就搵劉兆佳。佳叔又好人，次次有求必應。

如是，佳叔身上又發生「小明現象」了。

某前高官拉我講：「碌Sir，佳叔係專，但間中分析及資料，也會流流哋㗎！我都聽過不少佢老哥靠估的意見。記者們應該勤力啲發掘多幾個『中央專家』啦！」

曾智華

阿碌開咪