阿碌開咪｜好彩打咗三針

近日凡經過屋邨公園仔，都聽到不少老人家在呻：「唉，一家又一家茶樓關門，冇得飲早茶，真係……再加上又冇得見『Soon仔』。政府又話打咗針就可以『飲茶見Soon仔』。結果兩樣都冇，又悶又無聊，唔知點打發日子！」

小弟也如是，發覺近日土瓜灣食肆關下一家，關下又一家，已經再難有選擇矣，冇晒癮。

幸而靠背壟道仍有一家連鎖的，頂得住。不過，前朝七點踏入，見到部長阿姐鬼食泥咁款：「呢個又話確診，嗰個又話緊密接觸者，仲有個竟然話心情差唔想返工。如今得返兩丁友，點頂咁大個樓面啊？一於做埋你暫停堂食，只做外賣嘞……（下刪五百字苦水）」跟着，見佢猛打電話搵幫手。終於半小時後，有兩個臨時工肯返，先再次開堂食。

其中一位相熟肥妹妹落完單，同我講：「碌Sir，幾日冇見，你估下我發生乜事呢？講畀你聽，寫出嚟可能幫到部分讀者安心㗎！」

原來五日前佢收工返家，哥哥同佢講：「阿妹，有同事確診，不如一齊做快速測試啦！」

兩個人「隊」鼻，十分鐘後一睇，哎吔吔，一同顯示兩條紅綫，即係中咗！唔使驚，冇發燒，又冇喉嚨痛，速速服必理痛，飲大量熱水，上牀瞓。

一宿無話，第二朝兩個都有微燒，喉嚨少少癢，但冇乜唔舒服。一於按衞生署指示，自我隔離，請阿媽煲薑茶飲，繼續休息。

如此，第三日朝，已明顯好轉，發燒及喉嚨唔舒服皆減退。繼續服必理痛，飲熱水及薑茶，再瞓瞓瞓！傍晚起牀快速測試——陰性。Yeah！

終於第四日起牀乜事都冇，精神晒，再快速測試。早一次，陰性，晚一次，又陰性，搞掂！

就此，第五朝女部長嗌救命搵幫手，佢立即返工。

「碌Sir，中招，根本唔使驚，亦唔使衝急症室，自己搞掂已可。不過，聲明啊，我打足三針㗎（佢豪氣展示手瓜，信心十足咁款）！」

曾智華

阿碌開咪