樂●活｜網購DIY套裝 由零開始的滿足感

樂●活｜網購DIY套裝 由零開始的滿足感

疫情嚴峻，如非必要，都係留家抗疫比較好，唔想淨係煲劇、碌Facebook、IG的話，可以考慮入手DIY套裝，唔單止可以消磨時間，由零到完成嘅高興仲好有滿足感！

●簡約木雕雀仔套裝：喺屋企都可以做到木雕，Boxset已經預備好已切割外形嘅椴木、NT-CUTTER日本製橫手刀、KOREL 5D級防割手套、鉛筆、擦膠及簡介說明書，可以睇住Step-By-Step網上教學一刀一刀雕出木雀仔，即使新手初學都沒有難度啊。不過，因為刀具相當鋒利，雕刻時要特別小心！

●泡泡浴球Bath Bomb DIY Set：只要屋企有攪拌器皿和麵粉篩就可以做到，只要大概2個小時，攪粉，搓粉就可以親手做到泡泡浴球。套裝包括可做到5至8個細浴球或3至4個中型浴球，會用上小梳打粉、檸檬酸、木薯粉、白脫牛奶粉、他他粉、底油、香薰精油、模具、限量版手提袋，仲有埋網上教學影片，可以跟住Step by Step咁做，就連小朋友都可以整到。仲有幾款唔同主題嘅套裝可以揀，包括用上薰衣草香薰精油、呈紫色甜睡豬豬泡泡浴球；檸檬加尤加利香薰精油、蘋果綠色嘅強呼吸管道泡泡浴球；雜果賓治（甜橙、青檸及佛手柑）、粉紅色香噴噴泡泡浴球。

●UV滴膠可愛小動物掛飾套裝：內有UV滴膠、著色色粉、貓咪底座、金色頸鏈、閃石、C圈、中文圖解說明書、USB插頭UV滴膠專用LED燈，只要跟住教學圖片或短片，就可以一步一步完成滴膠掛飾。掌握咗技巧之後，仲可以之後自行在再買材料，繼續發揮創意製作唔同嘅滴膠飾物。

● 手工腸粉DIY套裝：喺屋企都可以整到手工腸粉！手工腸粉DIY套裝內附蒸盤（24.5cm x 18.5cm ）、油掃、濾網、膠刮，起盤夾、粘米粉、澄面及食譜，當中嘅蒸盤係用上碳鋼材質製作，唔會黏底，可以手喺屋企整街頭小食腸粉、叉燒腸、蝦腸、甚至飯後甜品芒果腸粉一樣得，不過要記得自行準備叉燒、蝦等食材，同埋要記得準備豉油、甜醬、麻醬等。

可以喺屋企最容易整到嘅DIY，當然唔少得烘焙糕餅啦，無論係彩虹戚風蛋糕、Doughnut、古早味蛋糕、手工蛋卷、雞蛋仔。又或是卡通造型曲奇及饅頭等，一樣可以網購直送到家，夠晒方便。

作者：Laurie Wu（愛保健愛旅遊愛購物的熟女）

 

[email protected]