阿碌開咪｜擁公權 須敏感

入境處副處長郭俊峯及首席入境事務主任汪奇，中秋節前各收咗一個送上門的名貴食物籃，竟然「咁啱」被全程拍到，連內容有乜都統統透明化。送禮的人，正是近日非常受關注的恒大集團執董、香港公司總經理黃賢貴。

　　略有「江湖經驗」者一睇就知，根本整件事充滿「幕後部署」，有人「儍下儍下」，竟毫無戒備而入咗局，雖冇犯法，仍一身「奶油」（招惹大量蟻也）！

　　昨晚剛與幾位廉記前高層及兩位著名「擔X唔偷食」退休高官晚飯，當然又提起此事。

　　老廉A：我以前拉過不少高官，發覺，原來並非愈高位者會愈小心的。反之，坐得愈高，愈少受監察，多敵不過人性中的貪婪，兩下就畀商界大鱷攻陷。

　　老廉B：係㗎！坐高位者，有責任監管下屬Whiter than White。而佢自己則位高權重，怎不Bound to be Corrupted？商界大鱷同你搞關係，當然「包裝」成朋友，繼而稱兄道弟猛送禮啦。你以為大家有真感情？有冇再天真啲？你睇下「煲呔」同「肥龍」以前稱兄道弟班商家去晒邊？

　　老廉A：人哋送禮物時，當然話冇公事關係啦。你懵懵哋收下一次，收下又一次，收咗十次之後，有需要時，你個「朋友」突然要求你「幫幫手」，你點反應？更重要，你有冇先搞清楚，啲果籃及禮物，是否開公司數？

　　清官C：其實，官場皆知，有兩類紀律部隊阿頭，大富豪特別喜歡同佢哋「做朋友」、稱兄道弟，一為入境事務處，另一為海關！N年前政府最高層已知呢兩個部門敏感，故一段時間，只派AO空降，以免兩部門決策層與外邊有太多不正常複雜關係。

　　清官D：係囉，今次呢單，收禮的，一個睇簽證，一個睇Control Point，兩個鎖匙位把關人物咁樣收「朋友」禮物，若你係佢哋下屬會點睇？我都好想公務員事務局局長聶德權暫時放低「谷針」，對呢單野講兩句！

曾智華

阿碌開咪