阿碌開咪｜肯定度身訂造

某某高官傳來公務員學院院長招聘廣告，當然係想小弟多多宣傳，難道叫我去考咩！

任何政府高層職位，所謂公開招聘，你知我知，當然有晒目標人物，然後在條件上度身訂造，扮下都要，公開走走過場。結果——只得佢啱咋！

事實，咁重要位置，仲要係第一次出現呢個位，百分百唔衰得，點可以畀個三九唔識七者做？故此一定要中央信任，而特區政府高層，也要絕對掌握此人的能力、作風及價值觀（當然包括政治）傾向，所以一定係熟人，兼且一定從公務員系統中找尋。

其實小弟以前已多次公開講：「喂，次次嘥幾百萬元去『招聘』廣播處處長，絕對浪費納稅人金錢！尤其有次簡直核核突突，將廣播處處長大學學歷要求取消，擺明鋸低三吋就某君，太離譜了。冇大學學歷，去管幾百個有大學學歷又具豐富廣播、管理及製作經驗者，邊會有人服㗎，擺明攞嚟搞！」

結果在反對聲拆天響之下，政府才在唔覺唔覺之下修正返，從此再冇咁荒謬的招聘條件出現。

今次呢個公務員學院院長位，一睇要求，哈哈哈，小弟立即心裏有數是為誰「訂造」啦。目標人物，我一定認識（嗱嗱嗱，冇話係朋友呀），佢亦肯定稱職（因已早早長期「在職訓練」矣）。

邊個？首先，唔會係做開D8、D10人工降格去做，咁已經篩走好多現任及退休高官嘞。

兼且要具本地、國家及國際事務，並全面準確掌握「憲法」、《基本法》及《香港國安法》。

單單呢三味，已再將人選收窄到得返三幾個啦，邊有機會爆半冷（勿講大冷了）呀？

一般AO，根本諗都唔使諗，就算做開律政署的，一去到卓越領導及管理才能，敏銳觸覺，喂，若裏面有，都升咗超過D6啦。

所以，個「局」根本有晒硬性框框，邊個傻下傻下走去報名，食硬檸檬！

我睇，百分百由就快退休的紀律部隊高層過檔啦，應該同係D6級，人選呼之欲出！

曾智華

 

阿碌開咪