阿碌開咪｜兩氣場極勁政壇大佬

今時今日，仲有冇人敢自認，又或公認是「政壇大佬」呢？董建華？梁振英？梁君彥？曾鈺成？廖長江？陳智思？任志剛？

　　任何由上世紀七十年代走過來，略有涉獵官場及政界的，都會話畀你聽，以上人物，全部No Way！因一個都冇政壇大佬的氣場與風範。做得政壇大佬，必須智慧過人，有懾人魅力（Charisma）及壓場威勢。仲有，夠惡！

　　昨晚，與一班商政官江湖老鬼聚會，數數現今政壇，仲有冇公認「大佬」？一個都冇！但上世紀七十、八十年代，當然有！其中兩個，真是有大Sir C，以及有超人智慧的L爵士。兩皆早作古而去，但遺下的，是大量經典回憶。

　　兩位「大佬」，當年擔起甚多公職。一坐上主席位，立即可以震懾高官及各路委員。曾參與過大Sir主持會議的「P總裁」，憶起昔日兩位的威勢，真的是無限羨慕。因P哥如今也要不時主持會議，但唔知點施下馬威！

　　「先講講L爵士。佢每次開會，都要求所有委員先詳細閱讀職員提供的資料及數據，消化好才出席，以達致最高效率。L Sir開會，每項都問有冇意見、有冇反對。大部分人就唔敢出聲，於是殊殊聲通過。某次，突然有位張XX議員舉手話有意見，要反對。阿Sir眉頭一皺，望望現場，見到鴉雀無聲，於是講，冇人附和你，得一票，議程通過！」

　　「總裁P」哈哈笑指：「以前開會，比如今有咗《國安法》後，更神速呀！」

　　佢停一停，又講大Sir C：「C爵士歷任各大學主席。一次開會，有委員舉手問：『 主席，民主參與乃不可抗拒大潮流，學生代表入管理委員會，肯定屬遲早發生的事，我哋應否行先其他大學一步，畀學生參與管理工作呢？』」

　　答案係乜？哇哈哈！教父C面色一沉，兜口兜面噴提意見者：「你死，也是遲早發生的事，點解你唔????家即刻去死？」

　　「政壇大佬」威勢，果然非同凡響！

曾智華

阿碌開咪