阿碌開咪｜一唱做嘢 · 一靜收工

上周五《頭條日報》A1獨家報道，九龍城三條旺街數十個公共泊車表位，長期被「泊車黨」霸佔，並以兩小時六十元向車主出租，非法濫用公共設施牟利。

呢類行為，根本並非牟利咁簡單，而是變相「恐嚇」及「勒索」！因為班「泊車黨」係明刀明槍收錢，若果唔畀，就趕你走。若果你夠膽移開佢張膠凳或雪糕筒照泊車，咁班友的眼神甚至出晒口：「老友，小心你架靚車啊，畀人整花就無謂啦，噴一噴油都一萬幾千蚊喎！」

以上現象，日日出入九龍城（行人或駕駛者）一族無人不知，故此，執法者更肯定百分百了然於胸！事實小弟親眼見過N次巡警及交通督導員經過，完全唔「做嘢」，掂行掂過，當乜都睇唔到。

究竟點解會長期可以咁，怕且就算有記者死????發問，九龍城區指揮官都只能咿咿哦哦，顧左右而言他，因肯定有某些「事實」不能公開講！

好嘞，幾時會「突然」改善或肯「做嘢」呢？全港政府部門十之八九皆如是——畀人擺咗上枱，曝光，瘀晒。

正如上周《頭條日報》圖文並茂，唱九龍城警區對非法泊車，甚至違法霸位「詐盲詐聾」。

咁……唉，咪做下嘢囉。立時派多幾架警車在福佬村道、獅子石道、侯王道、城南道、衙前塱道、南角道、龍崗道兜來兜去，表示「我做緊嘢」！有冇效？當然有！故此，上周六開始至周一，止得下咳，啲霸位膠凳及雪糕筒暫且失蹤。

不過，永遠如是，當報章頭版力鋤食環署唔睇後巷，搞到蛇蟲鼠蟻橫生、垃圾烏蠅蚊螆滿布，咁食環咪派人洗兩日太平地囉，跟住……

政府部就是如此——一唱做嘢，一靜收工！傳媒唔唱，咁就大家當冇事發生。

九龍城各街道的非法亂泊亂佔也如是。我前日刻意再揸車落去四圍兜兜，明顯執法力度開始「退潮」，因交咗幾日貨，再冇報章日日追住。咁咁咁，係咪「大家都要溫食」心態又開始瀰漫呢？

曾智華

阿碌開咪