阿碌开咪｜两气场极劲政坛大佬

今时今日，仲有冇人敢自认，又或公认是「政坛大佬」呢？董建华？梁振英？梁君彦？曾钰成？廖长江？陈智思？任志刚？

　　任何由上世纪七十年代走过来，略有涉猎官场及政界的，都会话畀你听，以上人物，全部No Way！因一个都冇政坛大佬的气场与风范。做得政坛大佬，必须智慧过人，有慑人魅力（Charisma）及压场威势。仲有，够恶！

　　昨晚，与一班商政官江湖老鬼聚会，数数现今政坛，仲有冇公认「大佬」？一个都冇！但上世纪七十、八十年代，当然有！其中两个，真是有大Sir C，以及有超人智慧的L爵士。两皆早作古而去，但遗下的，是大量经典回忆。

　　两位「大佬」，当年担起甚多公职。一坐上主席位，立即可以震慑高官及各路委员。曾参与过大Sir主持会议的「P总裁」，忆起昔日两位的威势，真的是无限羡慕。因P哥如今也要不时主持会议，但唔知点施下马威！

　　「先讲讲L爵士。佢每次开会，都要求所有委员先详细阅读职员提供的资料及数据，消化好才出席，以达致最高效率。L Sir开会，每项都问有冇意见、有冇反对。大部分人就唔敢出声，于是殊殊声通过。某次，突然有位张XX议员举手话有意见，要反对。阿Sir眉头一皱，望望现场，见到鸦雀无声，于是讲，冇人附和你，得一票，议程通过！」

　　「总裁P」哈哈笑指：「以前开会，比如今有咗《国安法》后，更神速呀！」

　　佢停一停，又讲大Sir C：「C爵士历任各大学主席。一次开会，有委员举手问：『 主席，民主参与乃不可抗拒大潮流，学生代表入管理委员会，肯定属迟早发生的事，我哋应否行先其他大学一步，畀学生参与管理工作呢？』」

　　答案系乜？哇哈哈！教父C面色一沉，兜口兜面喷提意见者：「你死，也是迟早发生的事，点解你唔????家即刻去死？」

　　「政坛大佬」威势，果然非同凡响！

曾智华

阿碌开咪