【阿碌開咪】「牛肉乾」幾時派

早早早早，小弟已在此敬告/警告大家，今個財政年度，政府必定大開「牛肉乾殺戒」。無他，疫情下使咁多錢，邊處搵返？N種方法，其中最易，派「牛肉乾」！經濟學ABC，香港車位，百分之一千供求失衡，汽車發牌數量與合法車位數量比例，相差極遠。即係話每日都有數十萬輛車非法亂泊，即係有數十萬個機會畀政府賺四百元！車輛發牌數量由政府定，合法車位數目，也由政府操控，即龍門任搬，問你班車主及司機死未？

早前財爺已在《預算案》中公布，「估計」來自檢控違例停泊方面的罰款收入大幅飆升。咁即係點？即係會抄抄抄，狂抄！根本唔使「盲公陳」占卜都知。

果然，之後警察及交通督導員日日做嘢！

以前，好多人覺得派牛肉乾有不成文規定，例如過時過節唔派；入夜後唔阻街唔派；在「警民關係」良好的區域Double Park唔派；「自己友」居住或工作地頭唔派；打風落雨唔派；早餐時分唔派……以上「規定」係真唔係真？

曾幾何時，絕對真！相信大部分車主都心照，並且掌握幾時泊、泊邊處會屬高危，又或相反，故可放心非法亂泊。

本周一，呢呢，我就幾乎中招嘞！當日三號風球，橫風橫雨，剛剛約咗朋友在尖沙嘴寶勒巷晚飯。眾所周知，寶勒巷乃龍蛇混雜之地，通常呢類區域，「警民」都有充分默契，你代客泊車，搵啖食，我不會無情情趕盡殺絕。相對地，呢個你地頭，一定要將秩序維持得「好好睇睇」！

正因三號風球加上述「誤解」，再加埋三十七元一小時停車場全部爆滿，我剛見路邊有車駛離，立即倒車入。嘩，舒服晒，大安旨意晚飯。

豈料晚上十點半落街取車，竟見前面紅藍燈閃閃，大件事！果然，一隊警察在抄抄抄。
吓？如此惡劣打風天氣，如此傳統「江湖地段」，如此深夜時分派「牛肉乾」？嘩，真係要講句「今時唔同往日」嘞！

曾智華

阿碌開咪