【阿碌開咪】活下去 豁出去

近年不少名人坐監，有前特首、前政務司司長、前立法會議員，更有富甲一方的大富豪，幾乎全部絕對冇人估到會「搞成咁」。

　　坐監當然唔好受，不過，殺到埋嚟就要啃。啃，講就易，真正面對又如何？

　　兩位昔日香港最高位置人物曾蔭權及許仕仁，未入獄時，不但身處權力頂峰，受盡百商巴結，當然更天天享受豪華官邸及有成隊人服侍。

　　所以，一般人估計，佢哋應該無法面對牢獄之苦的，即係……

　　結果所有人，包括最熟悉的人，全部跌晒眼鏡！尤其許仕仁，入獄前天天紅酒美食、欣賞古典音樂、坐頭等機位飛來飛去，豈能接受長期被困沒有私隱小小鐵倉？

　　時間證明一切！原來兩位昔日香港的No.1、No.2，是可以順利捱過幾年鐵窗生涯，順順利利健健康康步出監獄的。

　　之後，一眾八卦塘邊鶴又爭住問：「咦，佢兩個，跟住點生活下去呢？會否滿腔仇恨，唔再見人，又或出走他方呢？」

　　答案係——冇！

　　首先講講「肥龍」許仕仁，出獄時的確乾咗瘦咗（獄內冇啖好食嘛！），但經過年幾調養生息，可能再「食返靚野」，不時見到佢的跑馬地街坊，形容老許如今精神飽滿，神態自若在區內出出入入。每天指定動作，為到報攤或便利店購買報章雜誌，選的皆與政治、財經有關的，包括國際權威刊物，顯示仍極度關心世界大事。

　　「煲呔」又如何？朋友形容佢「已經完全擺脫心魔」。這個，一眾旁觀者認定，此乃宗教之力，上帝令佢放下一切仇恨包袱。

　　今天「煲呔」已可談笑自若，穿梭昔日朋友與同袍聚會，唔再染頭髮，自然Look，不停地咧嘴而笑。

　　前高官形容：「你想都想唔到，四位前任及現任特首，如今最活得快樂而最豁達開懷的，竟然是曾經滿腔怨鬱被判監禁幾年的曾蔭權！佢嗰種開心法，接觸過者就會感受到，完完全全由心而出。靈性最高境界，將一切看透，再放下，就是這種心態了！」

曾智華

阿碌開咪