【阿碌開咪】搬起石頭打自己腳

童年時，我家有位長輩是毛澤東迷，幾乎一起牀就聽紅歌，大播特播，於是所有歌詞似打樁咁打晒入我小小腦袋。唸書冇咁叻，但唸以下幾首歌，相信入墳墓前都可以一字不漏唱出，包括：《大海航行靠舵手》、《東方紅》、《歌唱祖國》、《國際歌》……當然《義勇軍進行曲》更肯定遠勝大群「港英遺臣」。

另外，長輩也不停朗讀《毛語錄》，故小弟對毛主席的名句，也琅琅上口，包括：槍杆子出政權；團結就是力量；天要下雨娘要嫁，由她去吧；革命不是請客吃飯；哪裏有壓逼，哪裏就有反抗；敵進我退、敵疲我打……

最深刻印象的，是——搬起石頭打自己腳！用現代市井術語演繹，就是「捉蟲」！

點解會諗起呢句口號？因見到「林鄭心戰室」（政策創新與統籌辦事處）早前撥款給中文大學，做關於中學生對政府信任的調查。

哎吔吔，真係呢……使鬼做咩！係香港人都預知結果啦。毫無意外地，近九成高中生不信任政府。

這個調查，百分百「搬起石頭打自己腳」，有少少政治敏感度者，都不會今時今日做個「咁樣嘅」調查啦，未瘀過乎？

結果一出，小弟大群退休高官、政界專業界阿哥阿姐、媒介「老是佛」老友……無不笑到見牙唔見眼（幸災樂禍？），多數衝口而出：「假若做埋大學生、全港老中青年人，得出結果，肯定對林鄭更有『啟發性』啊，哈哈哈！」

以小弟三十多年公務員生涯的認知及觀察，實在無法理解今次政府為乜「搬起石頭打自己腳」咁離奇。因以前政府做嘢，例如成立乜乜物物諮詢委員會，或做乜乜物物調查，都是先有「目標結果」，才再諗下點樣借助個「委員會」及「調查」去達致者。所以，「委員會」一定係自己友，而「調查」的問題及Methodology，則必定精心推敲，保證不會爆軚甩轆出軌。

今次搞出個咁瘀結果，會否有高官要問責而人頭落地呢？

曾智華

阿碌開咪