【阿碌開咪】「狂特」生蝦咁跳

國際外交，就是一盤千變萬化的棋局。下棋者，沒有誰對誰錯，個個都只為本國利益而思考，所以，分析棋局，最不智是Take Side，如此就不會有客觀判斷了。

一直以來，美國是全球最大霸權，無可爭議。不獨在軍事方面，更在「軟侵略」方方面面，例如互聯網、新聞傳媒、文化滲透（演藝娛樂製作）皆無孔不入，各國一是跟佢走，唔跟只有捱打，尤其弱國，例如中東小國更畀佢任炸，總之度個藉口就出兵。

大家敢怒而不敢言大格局，終因「串串貢」的總統特朗普出現而打破。

因佢岸崖自高，得罪人唔使本，國內樹敵無數（尤其傳媒）外，國外更串盡本來是盟友的歐洲各國領袖及旁邊的加拿大總理。

終於搞到不少人在等，等乜——等佢幾時死（落台）。一日未落台，一日都只敷衍住你先，唔反面，但又唔會衷誠合作。

美國大戰略簡單，就是要將中國撳撳撳，唔撳瓜都撳到阿二位置都不保。美國上下因共同利益，加上政府日日妖魔化中國，基本上目標一致。

但其他國家又如何？喂，好似並非與你美國利益一致噃，尤其中國擺明是世界No.1消費大國，我同佢反面，咪等於同自己國家經濟發展倒米？有冇咁蠢呀？

中國也如是，你美國全攻型「打」我，我有冇咁儍純捱打？老友，《孫子兵法》中國人寫㗎，當然識得使出合縱連橫大法，趁全球領袖憎死「串王」特朗普，一於暗暗逐國伸出友誼之手，尤其撬走你本來想聯埋嚟砌我的歐盟。

假若特朗普仍是下屆總統，可能難度高一點。但如今？你日漸變跛腳鴨，當然趁你就快「冇命」，加速撬牆腳！難得歐盟早早厭倦做「美國跟班」，也想樹立自主外交策略，就這大形勢下，中歐投資協定立時水到渠成，蜜月期開始喇。

默克爾及馬克龍兩大歐盟龍頭國領袖，肯定好快訪問中國。「狂特」生蝦咁跳已冇人理，且看拜登點擺棋啦。

曾智華

阿碌開咪