【独家】被二汶踢走 巴打罢睇《造星III》 「翻版石原」Christine歌手梦未碎

ViuTV选秀真人骚《全民造星III》正播得如火如荼，首轮分组对决于上周结束，深得男工作人员及巴打欢心、有「港版石原聪美」之称的44寸长腿郑嘉欣（Christine）被导师二汶Foul出局，惹来全城哀号，支持者在讨论区表达不满，声言罢睇，甚至烧at17啲碟！事后Christine爆喊嗌不舍，她接受《头条日报》记者访问时表示绝不就此放弃歌手梦：「公司有同我倾，可能会出歌，而家都多咗好多广告。」撰文：黎宝伦　摄影：张咏森

《全民造星III》自开播以来掀起不少话题，上周40强揭盅后，好多网民都戥被Foul出局的参赛者唔抵，当中巴打们最不舍的是身高178cm的「港版石原聪美」郑嘉欣！有粉丝在讨论区留言称嬲到「差啲掉烂部电视」，又扬言罢睇《造星III》，甚至传有男工作人员冲入房向监制花姐（黄慧君）求情，对此Christine表示：「多谢网民戥我唔抵，但我觉得导师有自己嘅考量，留得低嘅队员都一定有佢哋过人之处，希望佢哋加油，我都会加油！」

衰冇自信
至于比赛中输啲乜？模特儿出身的Christine坦认缺乏自信，以致未能展现出自己的独特性。谈到10多年后重拾跳舞，要短时间内赶上大家的进度，Christine亦倍感压力而数度爆喊，幸得战友们指导，「Alan、陈苇璇都系出道好耐嘅歌手，喺佢哋身上吸收到好多唔同嘅经验，参加比赛最紧要挑战同超越自己，去到呢个阶段已经当自己赢咗，无论心态、技能都提升好多。」由细梦想当歌手的她又谓势必踩入乐坛，「我一定唔会放弃，呢个梦想已经坚持咗好耐，完咗比赛反而先系啱啱开始。」

接受批评
对于被恨批是「花瓶」，Christine坦言外界对靓的既定印象是「乜都唔识、唔使点做」，但自己好畀心机去洗脱这个印象，亦一直有跟老师学唱歌。不过，当问到拣样靓身材正定跳唱了得？她还是搞笑称：「样靓身材正，因为唱歌跳舞可以靠后天！」所谓树大招风，有人欢喜的同时亦有Haters，提到石原粉丝轰她有辱女神兼哨牙，Christine自问不似神级的石原，也不敢跟对方比较，「睇到评论都系闹嘅，有少少唔开心，但做得公众人物就一定有好多唔同声音，我会接受，可能某啲角度有少少哨牙，希望大家快啲睇到我真人啦，真人好啲，哈哈。」