【独家】《造星III》十强大热起底 屋企开3间跳舞学校 ANSONBEAN有个猛料妈咪
2020-12-01 00:18 
ViuTV真人骚《全民造星III》刚进入40强阶段，刚满20岁个样似韩仔、兼且唱得又跳得的ANSONBEAN（陈毅燊），每次出场都唔会令人失望，加上有份同花姐拍广告，睇个势绝对有机会杀入十强攞埋冠军。《头条》收到料，原来ANSONBEAN咁跳得，同佢有个猛料妈咪林佩佩有好大关系，据知ANSON妈除咗开3间舞蹈学校，仲提名过李珊珊同欧阳妙芝参加港姐，同好多圈中人都好鬼熟㗎！咁捧埋阿仔入行都好正路啫！撰文：杜淑霞
《造星III》参赛者中，ANSONBEAN由面试到前哨战都相当亮眼，搞到花姐同两个导师林二汶同彭秀慧，都畀佢冧到心心眼。除咗他有讨好外型似足韩仔有对蒙猪眼外，唱歌唔差之馀，最重要真系坚跳得，一睇就知舞蹈根底好好，原来都系拜有个一样好跳得的ANSON妈林佩佩所赐。
据知，自小学跳舞兼读过演艺的ANSON妈，早在30几年前已经开设舞蹈学校，主要教授Funky Dance。现时在佐敦、湾仔和官塘都有分校，仲间间校舍都过万尺，在呢个环境下ANSONBEAN又点会唔爱跳舞，所以他和细佬细细个已学跳舞，近年仲加入埋妈咪成立的舞团「Unikrew」四出表演。
ANSON妈圈中人脉广
ANSON妈本身除了教跳舞开学校，旗下仲有演艺制作公司，本身都同好多圈中人好熟络，96年及97年就先后提名过李珊珊和欧阳妙芝参加香港小姐，最终李珊珊成为冠军，而欧阳妙芝亦成功打入最后五强。去年，ANSON妈公司仲有份帮张彦博演唱会《MORE张彦博MUSIC 2019》编舞。18年曾志伟监制的电影《黄金兄弟》，亦有邀请ANSON妈去睇首映，就知ANSON妈在娱乐圈广结人缘啦！
其实ANSONBEAN本身已是「Style International Management」旗下待出道艺人，身为日本名模水原希子、AngelaBaby、冯德伦、熊黛林和廖碧儿的同门师弟已经赢在起跑线，仲要有个咁多人脉咁猛料的妈咪，相信就算唔能够成功在《造星III》夺冠，在娱乐圈红都唔难罗！
最新回应