【独家】各有另一半唔好惹麻烦　连诗雅 胡鸿钧镜头外冇交流

虽然疫情严骏但TVB仍然赶工拍剧，日前就见到同陈家乐热恋中的连诗雅（Shiga），及同蔡思贝平稳发展中的胡鸿钧喺尖沙咀赫德道拍摄《金宵大厦2》外景，因为正值傍晚时份，见有明星仔拍嘢都有好多人围住睇，可能唔惯又或者唔想咁多人望住倾偈，甚至可能唔想被影到有太多交流，话晒各有另一半，所以现场所见两人镜头后冇乜嘢讲。采访:张咏森

《金宵大厦2》系《金宵大厦》的延续篇，继续由陈山聪、李施嬅呢对「两世情人」再续前缘，新一辑共有10个迷离单元故事，新加入的演员有伍咏薇、龚嘉欣、江嘉敏、与及饰演情侣的连诗雅和胡鸿钧，前者叫科云，后者系一个裁缝。

话咁快收工
Shiga呢期好忙，因为之前为主演的犯罪动作电影《无间行者之生死潜行》及播映中的《使徒行者3》宣传，不过有爱情滋润，Shiga冇乜走样，企喺街仍然好Sharp，一眼就望到。当日Shiga跟同唱片公司，块面愈嚟愈细嘅胡鸿钧喺街头拍闹交戏，闹得唔算太激动，等埋位时两人冇乜嘢倾，话咁快拍完收工，胡生就行过隔离街上车，Shiga就跟剧组上公司车走。