【独家】女团BINGO 出道4年冇人识 靠《造星III》翻身 卡文誓做有馅花瓶
2020-11-22 21:18 
女团BINGO成员26岁卡文（关嘉敏Carman）最近参加ViuTV《全民造星III》成功打入50强，前哨战打头阵出场，淡定表现即被两名导师林二汶和彭秀慧争崩头抢入组，证明有一定实力。出道4年卡文坦承始终知名度不高，希望今次靠参赛翻身，令观众重新认识她。有「翻版周秀娜」之称的卡文，最担心被睇死是花瓶，她讲明要做都要做有实力的花瓶，目标要杀入最后十强，望到时有上台solo演出机会。撰文：杜淑霞摄影：谭壹致
《造星III》面试时两位导师都话冇听过BINGO，卡文感受特别深，「梗系hurt啦！始终又唔系太短时间，都4年都仲系未有人听过你个名，连BINGO都未听过，咁都有啲灰心嘅，但系唔紧要啦！我都谂住重新开始，唔紧要继续踩啦！」
卡文承认4年来BINGO原地踏步，因不停换成员累事，她笑言：「我啲队员系可以开两枱麻雀！今次参加呢个比赛变咗冲破咗个关口，唔系用BINGO又再转人嘅方式去冲破，而系用自己个人名义。今次算自己独立单位参加呢个比赛，我都想知道，如果我唔系BINGO呢个名，我自己关嘉敏呢个名可以行得几远。」
望入十强个人表演
由于样靓身材正，卡文面试时被睇死做花瓶，即喊到收唔到声，她坦言要为女团平反，「唔希望吊住个名就俾人标签咗女子组合就系花瓶，我感觉一直以嚟都系比较多人咁样去谂，自己都唔想有呢个花名，其实花姐都成日讲，『你入围都系因为你花瓶，你靓咪入到围罗！』我想证明我唔系花瓶！」不过卡文亦承认靓女参赛确实有着数，「投票嘅时候啲人见到你幅相靓啲，咪着数啲罗！都系会有好处嘅，但系我都系唔想做花瓶，我想做一个有馅嘅花瓶罗！」
《造星III》现在开始分AB组对赛，更要参赛者互相投票淘汰同组成员，卡文投了老友Vincent即被网友狂插虚伪，卡文坦承预了网民的负评，反而最担心俾导师闹，「我觉得OK嘅，我可以handle到网民嗰啲，我系惊导师闹我，因为佢哋系教我嘢，佢闹我咪系我有啲嘢做得唔好或者唔啱，网民嗰啲我控制唔到㗎嘛！咩都会讲一餐㗎啦！所以我OK罗！」
讲到参赛目标，卡文好肯定话：「最希望梗系赢啦！但系入到十强已经好开心，十强有个人表演，因为除咗pre round系个人，之后全部都系小组表演，之后要到十强，我好想去表演自己想表演嘅嘢，谂一个构思展现畀大家睇。其实我已谂定，我好似十拿九稳一定入十强咁样，哈哈！有个构思好想表演畀大家睇，所以我一定要入到十强！」
最新回应