【躺著也中枪】参加《造星III》惹网民狙击　Odilia唔敢睇负评惊影响情绪

ViuTV选秀真人骚《全民造星III》于本月初首播，今季以「艺人再出道」为主题，当中有不少熟悉的面孔，包括前E-kids成员林咏伦（Alan）、前As One成员陈苇璇（前名陈嘉茵）、顾定轩等，旋即引来不少回响。在首轮面试中，节目监制花姐（黄慧君）已多次问参赛者，可承受得到观众的批评？可担心节目出街后，反令支持者流失？至今《造星III》已播出14集，首次分组淘汰赛正式展开，昨晚一集由A5组斗B2组，首位被Foul出局的是彭秀慧所训练的B2组成员Vincent。对此赛果，不少网民都戥Vincent唔抵，而同队的Bingo成员陈康琪（Odilia）更是「躺著也中枪」，有人留言：「咩世界咁都入到围」、「应该Out CY同Odi，留番Vincent」、「宁愿要Odi走」等。

然而在连登讨论区，已有网民以「每日OdiX老X问候区」为题开Po狙击Odilia，更有人设立「反Odi大联盟」，力数她自以为是、难相处、跳唱唔掂。一向大胆敢言的Odilia早前接受《头条日报》访问时，也坦言曾质疑自己是否仍适合做跳唱歌手，入到《造星III》，面对一众有实力的参赛者，她表示又惊又大压力，「其实系公司叫我哋去参加，起初我都话有机会畀人哋踩到落底㗎喎，入到去发现，其实前面谂几多做唔到嘅谂法都系多馀，做咗先啦，做到一个位睇番转头，可能反而得到更多。（有畀人闹到想放弃？）冇，畀人闹亲就愈想做得好，愈战愈强，我会观察评判赞嘅人，即使系一个未出道嘅人都有佢嘅好处，我就学习、吸佢嘅好处，再Modify喺自己身上，做艺术嘅人就要不断改善，要学识去深化个内容，令到件事变得有内涵，而唔系为做表演而做畀人睇。」

不过对于近日一地负评，Odilia今日透过电话回覆本报称唔开心咗几日，「首先都担心屋企人见到呢啲负评会唔会唔开心，节目出街后，妈咪都有问我：『阿女点解咁多人插你、抨击你嘅？』嗰刻都会有啲难面对，我都有搵朋友、经理人、同事倾诉；至于其他留言我都冇睇太多，因为免得影响自己情绪。」问到被指性格差、难相处？她否认称：「识我嘅朋友都知我系好玩得、好讲得笑，同埋性格比较直率啲，譬如见到有问题存在，我唔知点样去转弯抹角讲出嚟，但由始至终我都系对事，并唔系大家所讲嗰种难相处，希望大家会留意到我往后几集嘅表演，我想证明畀大家睇，参加呢个节目我系有决心做到一种改变、大跃进，我都好想有个转捩点变得更好。（后悔参赛？）冇，我好Enjoy每个Moment，呢段时间自己成长咗唔少，希望大家未来见到更加成熟嘅我。」