阿碌开咪｜「懒议员」应受罚

人贵自重，有啲野唔使督促，都应自动自觉去做。大人大姐，要罚才做就瘀爆啦。

我讲紧乜？讲紧手握公权又交唔足货的立法会议员！

未讲议员，先讲学生。中小学时，惯性上堂前要点名，故不能无故缺课。

很奇，中六开始，突然解放，大部分老师皆认为上唔上堂、学唔学习，到十八岁，已经应该有自由自决。事实，唔上堂乃阁下损失，责任自负，已经成年，毋须再逼。这种作风，由中六至大专，大部分学校如此，无人再用强制性手段逼你上堂。

我同唔同意？同意！反正你咁劲唔上堂，自修都功课及考试攞A，即「天才神童」啦。

不过，小弟又发觉，大部分老师/教授都对成世经常走堂的学生「另眼相看」，总之，你唔好衰畀我睇啦，唔上我堂等于唔尊重我，倒转亦然噃！　

学生如此，议员又如何？虽则如今已「完善」咗议会选举制度，「理论上」议员仍是选出来，要向市民交代的。

议员月月收公帑、享公权，岂可没有责任与义务？系乜？正是为市民服务，监察政府，开会睇文件，议政论政。

意即开会（返工呀！）乃其中一个重要责任。佢哋并非学生，学生唔上堂考试肥佬后果自负。但佢哋唔开会吞噗，虽有负市民所托，但收咗公帑唔做或做唔足野，似乎吹佢哋唔胀。

咁啦，议员有责任监察政府，传媒则有责任监察议员，全部衡功量值，若有失职偷懒者，一于公开省之哉，唔使客气！鬼叫你话代表我哋又唔交功课咩？

立法会会议，堂堂点名，故好清楚边个走堂。新一届立法会运作近八个月，九十名议员，减四个跳槽做高官，仍有八十六人，个个理应次次立法大会、内务委员会及财务委员会开齐。不过，点名后发现两名新丁林素蔚及苏长荣最蛇，「走堂」最多。新丁已如此，变了「老是佛」还得了？

唔开会总会藉口多多，市民根本毋须要听。除非病，否则一律兜口兜面喷：「唔想做请辞职！」

曾智华

阿碌开咪