阿碌开咪｜由海关「一姐」讲起

前日早上，《星岛日报》头条又有独家料爆：《何佩珊料本月下旬升任海关「一姐」》。

本报的独家料，有记录可寻，准到痹，唔使估坚唔坚啦，一定坚！

小弟传媒专业性上身，还是要搵可靠綫人问多一次，对方答：「接硬！」

事实所有纪律部队培养接班人，都唔会一朝一夕的。当「相」中一匹「劲马」后，就会用十几二十年去Groom，调到不同部门及海外培训，多番委以重任测试，一次又一次肯定冇搵错人，就会按部就班，在四十岁左右升呀升。此时，平排者大家已心照，边「只」有机会、边「只」冇机会。冇机会的，未必是能力问题，也可以是自己「唔想去」，向上司表明，宁愿借歪唔阻人，警队近年就有呢类例子。

睇返海关未来「一姐」何佩珊条升职綫，也是早早铺好，佢能力比平排高，加上不停发愤、个人增值。

我点知？骑骑，正因一九九九年至二○○一年，大家系同学仔罗，一同入读香港大学公共行政硕士课程，旁观佢能力，已显示属超班马。

其时二十几人一齐读，小弟年纪最「老」，四十五岁，而佢只是三十一岁。套用赛马术语，根本「无得跑」，因我已属「老马」，佢系「新马」。

说来当日小弟报呢个课程，目的并非为在学术上进修，而是为逃避压到透不过气的工作重担。

因一九八六年开始，我被电台大力栽培下，台前幕后电视电台一齐兼顾、一齐冲刺，结果很快精神系统已无法负荷，出现先而紧张，后而有少少崩溃现象。当时社会对抑郁症仍未有普及了解，我只知顶唔顺，又唔能够辞职，于是谂住报读港大硕士课程逃避工作。点知?…更大镬！因全班最大年纪是我，知名度最高又是我，心态完全唔衰得。

结果点？继续死顶狂刨书，再加仍要正常回电台工作，终于尝到乜叫「骆驼背上最后一根草」，成个人冧低，完全冇力郁动，开始求医，长期服用血清素。

曾智华

 

阿碌开咪