阿碌開咪｜由海關「一姐」講起

前日早上，《星島日報》頭條又有獨家料爆：《何珮珊料本月下旬升任海關「一姐」》。

本報的獨家料，有記錄可尋，準到痹，唔使估堅唔堅啦，一定堅！

小弟傳媒專業性上身，還是要搵可靠綫人問多一次，對方答：「接硬！」

事實所有紀律部隊培養接班人，都唔會一朝一夕的。當「相」中一匹「勁馬」後，就會用十幾二十年去Groom，調到不同部門及海外培訓，多番委以重任測試，一次又一次肯定冇搵錯人，就會按部就班，在四十歲左右升呀升。此時，平排者大家已心照，邊「隻」有機會、邊「隻」冇機會。冇機會的，未必是能力問題，也可以是自己「唔想去」，向上司表明，寧願借歪唔阻人，警隊近年就有呢類例子。

睇返海關未來「一姐」何珮珊條升職綫，也是早早鋪好，佢能力比平排高，加上不停發憤、個人增值。

我點知？騎騎，正因一九九九年至二○○一年，大家係同學仔囉，一同入讀香港大學公共行政碩士課程，旁觀佢能力，已顯示屬超班馬。

其時二十幾人一齊讀，小弟年紀最「老」，四十五歲，而佢只是三十一歲。套用賽馬術語，根本「無得跑」，因我已屬「老馬」，佢係「新馬」。

說來當日小弟報呢個課程，目的並非為在學術上進修，而是為逃避壓到透不過氣的工作重擔。

因一九八六年開始，我被電台大力栽培下，台前幕後電視電台一齊兼顧、一齊衝刺，結果很快精神系統已無法負荷，出現先而緊張，後而有少少崩潰現象。當時社會對抑鬱症仍未有普及了解，我只知頂唔順，又唔能夠辭職，於是諗住報讀港大碩士課程逃避工作。點知?…更大鑊！因全班最大年紀是我，知名度最高又是我，心態完全唔衰得。

結果點？繼續死頂狂刨書，再加仍要正常回電台工作，終於嘗到乜叫「駱駝背上最後一根草」，成個人冧低，完全冇力郁動，開始求醫，長期服用血清素。

曾智華

 

阿碌開咪