【阿碌开咪】唔放大假实属自私

官场中，不少人背后称之为「肥仔张」或「Barcode头」的N朝元老张建宗，真无奈，竟然现届政府最后一年，都唔畀佢「再坐一会」，惨吃豉椒炒鱿。

有冇人会同情佢？Yes少而No极多！因肥仔张在官场四十几年，有几多料、作风如何，真系「众所周知」。咁都可以无风无浪到公卿，升到上一人之下、十八万人之上。大学公共行政学系博士生做论文，乃绝佳「奇怪」个案！

张建宗，著名「好人」，有礼，绝少得罪人，服从上司，不争风头，兼且日日返工。

但佢著名有种犀利武功，叫「泥鳅功」，滑不留手。任何时间都可以用学术名词形容——Muddle Throug——To achieve a degree of success without much planning and effort！总之，浑下浑下就浑到上层。

「Barcode头」离开那天，一再强调已经强调过N次的——我从冇放过大假，也冇告过病假！

究竟代表乜呢？

上周佢被「搣柴」当日，小弟刚约咗几位退休高官喷口水。大家在官场经验丰富，乜都见过，已做官做到变精，乜都睇通睇透。席间评论肥仔张「唔放假」，评论如下：

A官：做公务员，去到上司级，自己唔放假，肯定是灾难性自私行为！因你唔放假，等于下属冇得署任。收多少少钱事小，冇机会在高一级工作中表现事大！若同綫竞争者个个有得署任，赞许表现写在人事报告中，但你在此栏则一片空白，你话几大镬？当然嬲死「唔放大假」上司！

B官：全中！仲有，你成只牛咁勤力工作（新界大把！），又唔放假，咁上司点睇你呢？英明神武的，必定觉得你怪怪哋，管治能力不够Macro，只似婆仔搣胶花，死做，必定唔多欣赏。

C官：仲有呀，下属见你成日唔放假，自己申请则要你批，咪次次好有「罪恶感」？呢类上司，点会令下属服或令士气高昂呢？

曾智华

阿碌开咪