【阿碌開咪】唔放大假實屬自私

官場中，不少人背後稱之為「肥仔張」或「Barcode頭」的N朝元老張建宗，真無奈，竟然現屆政府最後一年，都唔畀佢「再坐一會」，慘吃豉椒炒魷。

有冇人會同情佢？Yes少而No極多！因肥仔張在官場四十幾年，有幾多料、作風如何，真係「眾所周知」。咁都可以無風無浪到公卿，升到上一人之下、十八萬人之上。大學公共行政學系博士生做論文，乃絕佳「奇怪」個案！

張建宗，著名「好人」，有禮，絕少得罪人，服從上司，不爭風頭，兼且日日返工。

但佢著名有種犀利武功，叫「泥鰍功」，滑不留手。任何時間都可以用學術名詞形容——Muddle Throug——To achieve a degree of success without much planning and effort！總之，渾下渾下就渾到上層。

「Barcode頭」離開那天，一再強調已經強調過N次的——我從冇放過大假，也冇告過病假！

究竟代表乜呢？

上周佢被「搣柴」當日，小弟剛約咗幾位退休高官噴口水。大家在官場經驗豐富，乜都見過，已做官做到變精，乜都睇通睇透。席間評論肥仔張「唔放假」，評論如下：

A官：做公務員，去到上司級，自己唔放假，肯定是災難性自私行為！因你唔放假，等於下屬冇得署任。收多少少錢事小，冇機會在高一級工作中表現事大！若同綫競爭者個個有得署任，讚許表現寫在人事報告中，但你在此欄則一片空白，你話幾大鑊？當然嬲死「唔放大假」上司！

B官：全中！仲有，你成隻牛咁勤力工作（新界大把！），又唔放假，咁上司點睇你呢？英明神武的，必定覺得你怪怪哋，管治能力不夠Macro，只似婆仔搣膠花，死做，必定唔多欣賞。

C官：仲有呀，下屬見你成日唔放假，自己申請則要你批，咪次次好有「罪惡感」？呢類上司，點會令下屬服或令士氣高昂呢？

曾智華

阿碌開咪