快餐店食客用過餐具托盤鋪滿所有枱　網民：唔自律係香港特色

到快餐店用餐後，大家會自行清理垃圾嗎？有網民近日在沙田火炭一間連鎖快餐店，發現所有餐枱都幾乎放滿托盤、用過的紙杯、餐具等，遂發帖批評「『唔執嘢』『唔自律』就係香港特色」，引起網民激辯。

有網民在facebook群組「巴打絲打Facebook Club」上載照片，相中可見當時快餐店內食客不多，所有餐枱則放有托盤、用過的紙杯、餐具等，沒有人清理。樓主留言批評，「唔執嘢」「唔自律』就係香港特色」。

帖文引來大批網民留言，而且意見兩極。大多數人都大罵樓主「道德批判」，反問他「第一日住香港嗎？」、「我有比錢架，奉旨幫你執？」、「你去茶記，酒樓，餐廳食野會唔會自己執？」、「個餐嘅費用包左清㓗費」，認為「你鍾意自己執你嘅事」。

另有網民認為食客不會自行清理是正常，「因為香港快餐店已經習慣咗有服務，人哋外國嘅快餐店習慣咗自己執，其實係文化差異，你又唔可以話人哋唔啱嘅」、「執係美德，唔執係正常」、「其他人唔執唔代表其他人都有錯」；有網民則試過自己清理後，「個員工阿姐叫我唔好執，比經理見到佢會比人閙」，所以認為這現象與自律無關，甚至有人相信「太自律很多人失業」。

有網民則主張自行丟棄自己用過餐具，「因為會有其他坐，講真…清潔姐姐做得幾多，咪當幫輕下又唔洗令到下一位要坐嘅人麻煩」，亦有人批評，「香港人係自私嫁啦，執個盤都要同你計到盡呀」。