維港會：新買華為機捐來聖誕大抽獎 葉劉：用緊三星機就免浪費啦

內地科技巨企華為集團副董事長兼首席財務官孟晚舟早前在加拿大被捕，引來政客表態撐華為手機。新民黨主席、前保安局長葉劉淑儀話早幾日就話大讚華為手機好受歡迎，仲打算之後轉用華為機，更指通訊器材方面，所有美國貨「都好危險」。葉太好快「兌現承諾」，昨日在個人Facebook上載一段親身去商場買手機的片，花費6888元買了部華為手機Mate 20 Pro，話要用行動支持華為，不過，她說，不是用來自用架！

葉太在Facebook仲引店員所述，指這部手機效能好出眾，「手機內主要晶片也是由華為自行研發」，而且好受歡迎，「他們也只賣剩一部呢」。葉太買完機之後，話原本諗住自用，但自己依家用緊部三星手機，「都仲用得丫」，所以「唔好浪費」，製造更多電子垃圾，決定將部機捐畀新民黨做聖誕派對大抽獎，咁到時真係要睇下邊個幸運兒咁好彩抽得中啦！

葉太之前話過，除非冇替代品，否則通訊器材方面都會盡量避免用美國貨，更指「所有美國貨都係危險嘅」。有網民就留言問葉太，「知唔知華為嘅作業系統Android，都係由美國公司開發。」；亦有人指「你送電話畀其他人，咪一樣令其他人換電話，製造更多電子垃圾。」，當然亦有支持者，留言大讚葉太「識貨 」。