【世盃狂熱】連鎖快餐店Fb抽美斯水 下午茶減3蚊惹爭議

世界盃D組次輪賽事，克羅地亞意外以3：0擊敗強隊阿根廷，阿根廷以1和1負得1分，爭取出線有危機，結果震撼足球界及大批網民。一間日式連鎖牛肉飯快餐店的Facebook專頁則趁機「抽水」，推出下午茶套餐減3元優惠，卻引發爭議，有人讚好有創意，但也有人表達不滿。

貼文指，「尋晚世界盃阿根廷慘吞克羅地亞三隻溫泉玉子，但齋食玉子真係會有啲齋，可以考慮吓食埋牛肉飯喎！」並宣傳其世界盃優惠，「只要你嘅英文姓名有WORLD CUP其中2個字母」，在下午茶時段惠顧套餐可以減3元。

文末笑言「#美斯都用到呢個優惠」，更標註了阿根廷國家隊球星美斯的專頁。專頁管理員回應留言更稱，「食玉子食飽喇，希望佢下場可請返對面食啦！」。

雖然減3蚊對普遍一般食客有吸引力，有網民受落指，「三粒溫泉玉子笑死lol」， 「一定要幫襯，抽美斯抽得好」。

但部分球迷及網民批評，快餐店利用阿根廷的挫敗開玩笑太過火，有網民批評 「#出稿前先睇睇......#抽水快係好不過要抽得準」；「其實球員要付出好多年努力先有今日成就，因為輸波就要被人抽水，人身攻擊，甚至欺凌，你哋要三思而行」；「將自己的快樂建築在人地痛苦上的宣傳手法，無良心的公司」。有網民更聲言杯葛涉事快餐店。