中秋夜帶子女落街玩遭學生家長投訴教壞細路 校長要求老師道歉

老師平日忙於教學工作，既要批改作業又要備課，難有私人時間。有老師近日向Facebook專頁投稿抱怨，指趁中秋節帶同小朋友到公園散步玩燈籠，期間遇到學生及其家長，怎料回校後竟被家長投訴「身為老師咁夜仲帶小朋友落街玩」，校長更要求她道歉，忍不住大嘆「遲早老師返工放工食飯都會被投訴」。

該名老師近日向facebook專頁「老師心聲」投稿抱怨，指中秋節當晚與家人晚膳後到公園散步玩燈籠，原本一家人開開心心人月兩團圓，突然聽到有人大叫Miss，「原來係學生咁啱都去公園玩，禮貌上打招呼講聲中秋節快樂，但位家長就尷尷尬尬咁拉個學生走，好似當我怪人咁」。

直至中秋假期完結後，該名老師一回到學校就被召至校長室，原來當晚偶遇的家長投訴她「身為老師咁夜仲帶小朋友落街玩，學生見到咁就有樣學樣教壞晒」。該名老師又批評，主任與校長完全未有了解清楚事情，就要求她注意及道歉，「之前有教學助理於暑假期間出外旅遊都被投訴了，遲早老師返工放工食飯都會被投訴」，直言「做老師又有私人生活都是罪」。

帖文引起網民熱論，不少人留言批評怪獸家長同樣教壞小朋友，「個家長教壞細路呀，可以向邊到投訴？」、「怪獸家長在文明倒退」、「教師唔係人？無自己生活？」、「有家長看管未得囉，而且仲係中秋夜，第二日放假都係想大家玩得開心盡興而已」、「叫嗰個家長先去睇心理醫生先啦！佢自己先教壞細路，佢咪一樣咁夜出街，仲要帶埋自己嗰件！佢唔係靈魂出竅呀嘛？」；另外亦有網民批評校長處理手法有問題，「校長乃聖人！不去廁所！投訴佢！」。