張瞻11歲生日 張繼聰信有報應：可能過兩年會踢我出門口

張繼聰出席親子活動，雖然父親節要開工，但阿聰絕不介意，收工回家跟家人食飯慶祝。他說：「父親節有工開是一種幸福，證明我可給予小朋友幸福，若果父親節只是陪個仔，對個仔的前途都唔多好。」
阿聰續說兒子張瞻的生日臨近父親節，昨日剛剛度過其11歲生辰，更招待了10多位小朋友在家中開派對耍樂，眼見兒子跟朋友仔在客廳觀看世界盃及談天，甚有麻甩佬的縮影。阿聰感慨說：「好開心見到兒子快高長大，但他昨日全程跟我說不夠5句話，這個就是人生！原來世界是有報應，從前年幼時覺得父母阻住晒，喜歡生日找朋友陪，可能過兩年個仔會踢我出門口。」
阿聰在社交平台也晒出給張瞻的生日蛋糕，留言：「Happy birthday to my boy！眨吓眼就十一歲，我知道好快....你就青春期，會覺得老豆（竇）老土嫌老豆（竇）煩，有自己嘅諗法，有自己嘅世界（or感情世界），可能唔會再期待咁可愛嘅生日蛋糕，寧願同Friend去慶祝。我有心理準備㗎啦！因為我信報應，不過我都希望你繼續快高長大，每日都懷住感恩同興奮嘅心情去體驗依個美好嘅世界❤祝你努力發育，早日變聲兼牛高馬大，不過就算你份人變成點，有嘢係唔會變，你永遠都係我嘅花生米，Daddy loves you」。