學生哥問的士為何調頭走 網民反質疑不預早出門捱批

不少人返工返學趕時間都會乘的士，有學生哥在「的士司機資訊網Taxi」留言，指上學時見到有其他學生於的士站等候期間，不少司機見到學生哥都會調頭走，問群組內司機何解。有人留言反問學生「點解要搭的士返學嘅」，質疑學生未有預早出門，更稱「唔好問人哋點解唔問下自己點解」。 該名南區學生哥在網上呻，指「每日返學都會遇到司機見到的士站有着住校服嘅就會掉頭走，但係反而call車，D(啲)司機寧願做學生哥，唔明白點解司機見到着住校服會掉頭走？有冇人知道點解？」 有網民反質問學生哥未有預早出門，「點解要搭的士返學嘅，做任何事都要有預備工夫，起身返學都係，整齊儀容都需要時間，我諗你每朝都非常之趕時間，首先做好自己，當你有時間，就可以搭交通工具，當你預備功夫好成績就會好，唔好問人哋點解唔問下自己點解」。 該名網民留言引來不少批評，指「唔趕時間唔可以坐的士？」、「點解有時間唔可以搭的士？」、「 任何人只要預早出門口，就無需要搭的士，咁要的士嚟做乜」。