囡囡中秋初體驗扁嘴喊晒 謝安琪：要向哥哥拜師學社交

今日中秋佳節，人月兩團圓。好媽媽謝安琪（Kay）昨晚帶埋囝囝張瞻同半歲大的B女張靖（Karina）參加屋苑的中秋迎月晚會，老公張繼聰要拍戲冇份去玩。與鄰居賞月、傾偈、影相，Kay都話囡囡一開頭狀態不錯，腳仔撐撐有威勢，點知愈來愈多人過來打招呼時，人仔細細第一次過中秋的Karina喊起來，Kay唯有帶仔女到樓梯頂遠離人群，讓囡囡平復心情。 Kay心想可以同朋友吹水、吹風，不過Karina遠遠望住人群依然驚驚豬，Kay就話：「表情楚楚可憐仲一臉無辜，我都唔忍心要佢久留，我唯有叫哥哥自己同朋友留低繼續玩，我就要同妹妹先行回家。結束歷時10分鐘既（嘅）賞月初體驗，兩兄妹性格真係大不同啊。」Kay察覺大仔半歲時已經好識社交，囡囡零舍不同有矜持，仲叫Karina向哥哥拜師學習社交技巧。 返到屋企，Kay問囡囡今晚的party感覺如何？Karina繼續眼濕濕扁晒嘴仔，網民都大讚可愛，「個樣好慘豬，好可愛呀」、「要啲時間適應人群」、「得閒帶佢去蒲下啦」。