Wanna One見面會起混亂 司儀森美獲讚救場有功

韓國爆紅男團Wanna One昨晚及今晚在亞洲博覽館舉行首次香港粉絲見面會，首場逾8千名粉絲入場撐偶像。不過昨晚見面會原定8時開騷，因發生台下貴飛位Block A有粉絲拆櫈、搬櫈，迫到台前睇騷的突發事，大會要求Block A的觀眾回復座椅位置，不過離奇地有十數人無櫈坐。最後Block A觀眾要重新入場，見面會延遲了1小時45分鐘才開始。 見面會司儀森美今日凌晨一時多亦在社交平台表示：「難得的一天，幸好fans合作，總有學習的事，明天再續」。今日他在電台節目講返昨晚的突發事，大讚粉絲合作、不鼓躁，他說：「我喺台上企咗45分鐘，叫人拎返櫈岀嚟，有人冇櫈坐，叫人坐低，都乖乖坐。間中有幾個人叫開場，我轉用普通話講一次，工作人員都努力搬櫈。全場8千幾人，大家知道事態嚴重，粉絲要乾等都冇鼓噪，我好感動同開心。」森美坦言經一事長一智，希望今晚的見面會平安無事。不少網民都留言稱讚森美救場有功，「慶幸係你做MC ! 處理得好好，好彩有你」、「感覺全場所有人包括表演者EQ無比之高」、「你帶動氣氛做得好好，繼續加油」。 另外，Wanna One的官方社交平台就事件發出聲明，指昨晚的見面會因場內有觀眾移動座椅惹起混亂而延遲開騷，主辦方顧及觀眾的安全，重新整理會場再安排部分觀眾入場，希望觀眾遵守秩序、確保安全。