張繼聰開工冇份玩　謝安琪帶仔女去樂園度假

當老公張繼聰日接夜在外拍戲，努力搵錢養家時，謝安琪（Kay）亦專心湊仔女，趁大仔張瞻放暑假，Kay孖埋好友同一對仔女玩轉主題樂園的新酒店，休閒地享受假期。不過掛住仔女的張繼聰，趁工作空檔都要入轉酒店，半夜去錫啖家中寶貝 ，專登整個Good Night Kiss，好有愛。

Kay在社交平台分享靚相，囡囡張靖著住同色系的母女裝，非常可愛。身為哥哥的張瞻又抱實妹妹坐在酒店房內的小帳篷合影，兩兄妹笑起上嚟，真係餅印咁款。晚上欣賞夜景時，Kay更攝影師上身，操刀為囝囝影「寫真」，張瞻進入Chok爆狀態，Kay都話「夜色很美，擺pose有理」。

仔女玩得開心，媽媽Kay同樣盡興，嘟晒嘴舉V影相，並留言：「看到你們的笑臉，我便滿足了❤ #妹妹第一次入住酒店非常開心 #哥哥幫忙照顧所有女孩子很乖 #有機會一定要和朋友仔再去唷」。