黃宗澤扮妹妹仔下廚 嘟嘴紮噴水池辮

黃宗澤（Bosco）大男孩性格十分玩得，平日型男LOOK大大隻隻，但其實內心原來係個住家男。日前佢喺IG到放相，係廚房到自整海鮮食，仲有大閘蟹食添。不過點吸引都唔及佢一身「小妹妹」裝扮，紮噴水池辮，仲要嘟晒嘴咁，迷得啲女粉絲瘋狂留言，尖叫「會照顧你的男人更帥！！」 Bosco前排拍《飛虎極戰》型爆登場，一身飛虎武裝拍攝直升機拯救人質的場面，硬朗形象fit晒佢高大身形，仲搞到大汗淋漓。黃宗澤及吳卓羲要拍游繩鏡頭，Bosco仲搞笑話大家愈拍愈Fit，試過不停流汗一日可以輕2、3磅。 不過Bosco唔只武得，簡直係出得廠房，入得廚房，係IG到放整嘢食嘅相，留言話「客席大廚又出動啦！」有蟹有蜆有蝦，全部都有親手落手整，唔係做樣！