杜如風貼24年前九一分界大學畢業照 網民讚端莊似陳方安生

47歲的「世界級港女」杜如風好鍾意自嘲，之前出席活動大膽自爆自從被封「世界級港女」後已9年冇拍拖，坦認Dry到如海味一樣，名副其實「風乾」 咗。

唔緊要啦，就算係海味都係貴價嘅海味，出身富貴嘅佢曾經留學東京，自細飲日本奶水大，所以大個咗就不斷用金錢回饋日本。杜如風久不久都會PO舊相到IG話當年，最新有東京讀大學嘅畢業照，當時只有23歲，「媽媽說當時我亭亭玉立，要好好栽培成才…. 可惜這個女兒已經壞透了，冇得救啦！」

杜如風好勇敢，咁都夠膽貼出嚟。

陳年舊照上載後都幾大迴響，因為相中嘅杜如風梳住九一分界短髮，着住深色背心連身裙，加上一對高跟涼鞋，娘味濃到可納入「不想記起」名冊，但網民都算錫住佢，留言唔算太口臭，話佢似山口百惠，仲讚佢端莊秀麗，甚至有啲似陳方安生添。

張相放喺連登，留言應該賤100倍。

 

立即下載｜全新《星島頭條》APP：https://bit.ly/3yLrgYZ