獨家丨造星IV丨Ariel排尾三恨入女團 Dee撐SLM「羊群」呷醋要狂錫熄火

《全民造星IV》總決賽上周六圓滿舉行，賽前16歲的Ariel(曾家瑩)獲ViuTV一哥何啟華（阿Dee）發千字文讚好，並為Ariel呢位SLM（死𡃁妹）拉票，透露自己一再被Ariel的熱情、勤力、性情等感動，又直言：「如果有多啲時間就可以教你多啲Popping。」 採訪:娛樂組

就係呢篇阿Dee撐SLM嘅千字文激嬲「羊群」。

Ariel總決賽排18，評判分數第16名，網上投票排15。

一哥唔係得把口，原來佢為訓練Ariel，以友情價搵埋Retroll好兄弟，曾參加《造星II》的繼文及Jerry教SLM跳Popping。而阿Dee呢位「老竇」見到賽後一臉失落嘅「阿囡」即刻帶佢行埋一邊安慰，坦言總決賽排18有啲失望嘅Ariel話阿Dee叫佢唔好太Care分數，「佢話我好細個，條路未行完。」

Ariel開到口恨入女團，尋日傳出八人團名單冇佢，應該好失望。

比賽完後，參賽者接受訪問，阿Dee企埋一邊遙望Ariel。

睇Dee老竇個樣幾憐惜。

總決賽表演項目構思出自Ariel，「首歌都係自己寫，阿Dee執吓Rap同唱歌。」問到跟阿Dee闗係，Ariel答得怕醜，「關係好Close，佢而家都叫我阿女，經常同我排練，又叫朋友幫我排舞，好似老竇湊女咁。」問到比賽後最想做咩?Ariel秒速回答，「想入女團，由細到大都想。」

問返暫托排舞師繼文及Jerry，兩人都話係阿Dee叫兩人幫手，排舞排咗約兩星期，至於酬勞就係「友情價」，對於Ariel的決賽表現，繼文表示，「正式表演佢都盡咗力，以16歲小妹妹嚟講係好唔錯，絕對覺得佢適合入女團。」而Jerry就話，「發揮唔錯，學嘢好快，識跳dancing break ，自學popping ，又識rap， 英文又得，好叻呀。」佢仲話Ariel好啱入女團，「咁細個，學嘢咁快，而家入啱時候啦。」

繼文及Jerry都安慰Ariel，留意前者個Pass，寫住過氣造星參賽者。(笑)

阿Dee老竇同囡囡團隊。

旨呈都有鼓勵Ariel。

許廷鏗亦有攬攬Ariel。

Ariel被一班老竇愛錫好幸福，但一哥班「羊群」(Dee哥粉絲稱號）就唔係咁諗，對一哥出千字文Po讚好SLM唔多鍾意，覺得偶像過份關心SLM，仲群起喺TG Group表達醋意，自稱真主的一哥知道自己瀨咗嘢都冇逃避，以「𠱁女腔」錄咗段44秒嘅「冧羊」語音，唔係講笑，愈聽愈打冷震，原文如下:「我而家上水係為咗你哋，唔係為咗個死𡃁妹，你要繼續留嬲嬲，繼續要唔鍾意個死𡃁妹冇所謂，我唔介意，我冇話要你哋鍾意佢。之前有好多嘢處理，除咗死𡃁妹表演之外，冇時間理你哋感受，我知道有啲聲音，一路冇面對過，(開始用溫柔冧女聲音)所以畀少少時間真主好唔好?我而家錫返大家啦，啜啜啜啜啜啜啜啜，唔好太嬲，嬲多一陣好嘞，少少咁多，少少，少少咁多溫柔OK?錫返啦好唔好?臨走前都要講聲，愛真主，愛羊群，今晚見，錫多最後一啖，啜。」

阿Dee為𠱁Fans要用「𠱁女腔」隔空連錫九啖，香港搵食真係好艱難，辛苦晒一哥。