独家丨造星IV丨Ariel排尾三恨入女团 Dee撑SLM「羊群」呷醋要狂锡熄火

《全民造星IV》总决赛上周六圆满举行，赛前16岁的Ariel(曾家莹)获ViuTV一哥何启华（阿Dee）发千字文赞好，并为Ariel呢位SLM（死𡃁妹）拉票，透露自己一再被Ariel的热情、勤力、性情等感动，又直言：「如果有多啲时间就可以教你多啲Popping。」 采访:娱乐组

就系呢篇阿Dee撑SLM嘅千字文激嬲「羊群」。

Ariel总决赛排18，评判分数第16名，网上投票排15。

一哥唔系得把口，原来佢为训练Ariel，以友情价搵埋Retroll好兄弟，曾参加《造星II》的继文及Jerry教SLM跳Popping。而阿Dee呢位「老窦」见到赛后一脸失落嘅「阿囡」即刻带佢行埋一边安慰，坦言总决赛排18有啲失望嘅Ariel话阿Dee叫佢唔好太Care分数，「佢话我好细个，条路未行完。」

Ariel开到口恨入女团，寻日传出八人团名单冇佢，应该好失望。

比赛完后，参赛者接受访问，阿Dee企埋一边遥望Ariel。

睇Dee老窦个样几怜惜。

总决赛表演项目构思出自Ariel，「首歌都系自己写，阿Dee执吓Rap同唱歌。」问到跟阿Dee闗系，Ariel答得怕丑，「关系好Close，佢而家都叫我阿女，经常同我排练，又叫朋友帮我排舞，好似老窦凑女咁。」问到比赛后最想做咩?Ariel秒速回答，「想入女团，由细到大都想。」

问返暂托排舞师继文及Jerry，两人都话系阿Dee叫两人帮手，排舞排咗约两星期，至于酬劳就系「友情价」，对于Ariel的决赛表现，继文表示，「正式表演佢都尽咗力，以16岁小妹妹嚟讲系好唔错，绝对觉得佢适合入女团。」而Jerry就话，「发挥唔错，学嘢好快，识跳dancing break ，自学popping ，又识rap， 英文又得，好叻呀。」佢仲话Ariel好啱入女团，「咁细个，学嘢咁快，而家入啱时候啦。」

继文及Jerry都安慰Ariel，留意前者个Pass，写住过气造星参赛者。(笑)

阿Dee老窦同囡囡团队。

旨呈都有鼓励Ariel。

许廷铿亦有揽揽Ariel。

Ariel被一班老窦爱锡好幸福，但一哥班「羊群」(Dee哥粉丝称号）就唔系咁谂，对一哥出千字文Po赞好SLM唔多锺意，觉得偶像过份关心SLM，仲群起喺TG Group表达醋意，自称真主的一哥知道自己濑咗嘢都冇逃避，以「𠱁女腔」录咗段44秒嘅「冧羊」语音，唔系讲笑，愈听愈打冷震，原文如下:「我而家上水系为咗你哋，唔系为咗个死𡃁妹，你要继续留嬲嬲，继续要唔锺意个死𡃁妹冇所谓，我唔介意，我冇话要你哋锺意佢。之前有好多嘢处理，除咗死𡃁妹表演之外，冇时间理你哋感受，我知道有啲声音，一路冇面对过，(开始用温柔冧女声音)所以畀少少时间真主好唔好?我而家锡返大家啦，啜啜啜啜啜啜啜啜，唔好太嬲，嬲多一阵好嘞，少少咁多，少少，少少咁多温柔OK?锡返啦好唔好?临走前都要讲声，爱真主，爱羊群，今晚见，锡多最后一啖，啜。」

阿Dee为𠱁Fans要用「𠱁女腔」隔空连锡九啖，香港搵食真系好艰难，辛苦晒一哥。