獨家丨《造星IV》IvySo對入女團冇信心　畀限期自己嘗試幕前發展

《全民造星IV》1號IvySo（蘇雅琳）在全無表演經驗下，成功打入20強總決賽。其實IvySo初登場已成熱門參賽者，靚女加開朗活潑，好受粉絲歡迎，她亦承認社交媒體follower大幅飆升，不過她自爆未瘦身時冇人追，戀愛經驗只得一次。對於總決賽在即，她坦承入女團信心不太，但20歲的她仍想趁青春嘗試在圈中發展。採訪：杜杜、秦詠姿 攝影：葉君海、譚壹致

IvySo對於首輪演出後，獲得不少粉絲支持感到意外。

IvySo認為比賽期間，跳舞是其中一大難題。

 

身為1號參賽者的IvySo，甫亮相已相當受歡迎，這是她完全沒預計過，「我冇諗過嗰集出咗嚟會有咁大迴響，follower由本身7百幾升得好快變咗4千幾，到現在已經有7萬幾，所以係有啲嚇親，從來冇諗過。」不過她承認男粉絲確實較多，「我睇過社交平台啲數據，可能我係讀女校，之前都係7成女仔follower，而家男仔佔7成，我都覺得好驚訝。」對於受歡迎主因是靚女，IvySo就唔多認同自己外形出眾，「我覺得自己唔靚，又唔係特別叻，一開始都懷疑自己點解會入到96強，自己唔算特別出眾，不過啲網民又好似覺得我幾靚咁樣囉！我仲唔係幾敢睇自己playback，因為實力同外形都唔好睇，我其實係冇乜自信嘅人，譬如覺得自己顴骨好濶，個鼻又唔知點，我最鍾意對眼，因為似爸爸同媽媽，佢哋對眼夾埋一齊好靚。」

IvySo覺得自己顴骨太濶，唔算靚女。

中學時期的IvySo，如她所講同現在個feel差好遠。

 

肥妹時期冇仔冧

IvySo更自爆以往曾是肥妹仔加上讀女校，所以只拍過一次拖，「我中學時候同而家個feel好唔同，我之前戴細圓框眼鏡，同埋好摺掛住讀書好少出去玩，考DSE嗰時冇乜做運動好肥，最肥時有成57、58kg，而家瘦到49、50kg後，先會多咗人留意到我，所以我玩或者溫書出街，都係同學校嘅女同學一齊，之前都只係拍過一次，不過感情嘅嘢就唔講啦！」至於女神心目中的男神，IvySo講明絕非外貌協會會員，性格好重要，但如果才華方面，就最好似師兄阿Jer，「佢唱歌非常之好，所以我都好欣賞佢，而且佢嘅音樂製作班底都好好，同埋佢喺演戲方面都有突破，跳舞又比《造星》嗰時有進步，我都想效法佢，嘗試搵多啲可能性，再去突破自己。」

只得一次拍拖經驗的IvySo，以往主要同女同學去玩。

 

正面態度對負評

雖然IvySo得到不少粉絲支持，但本身未學過唱歌跳舞，表現確實比起不少參賽者差一截，加上靚女外形，被指是花瓶的負面聲音自然難免，但她完全不介意，還以正面態度面對，「批評同建議嘅comment我都會睇，對我進步嚟講非常有用，如果唔面對嘅話，反而局限咗自己，我個目標係再爭氣多啲，唔想畀人睇唔起或者覺得我得個殼，想有個開心energy之餘，會有多啲嘢畀人睇到。」IvySo認為自己能夠殺入總決賽都是見步行步，所以對入女團信心也不大，「如果性格方面係OK嘅，嚟緊有進步都有機會，但勁嘅人實在太多。」如果失落入女團機會，本身正在修讀護士課程的她，仍會畀個限期自己嘗試在圈中發展，但不排除回歸學業，「我想發掘吓先，既然入到呢度，我相信係有啲特質會畀人睇到嘅，但喺下年開學之前，如果冇機會正式入行，都會考慮返番去讀書。」

參賽後令IvySo愛上幕前演出，想繼續向這方面發展。

順利殺入總決賽的IvySo，直言冇信心能加入女團。