獨家丨姚煒帶張偉文上查經班練行路 夏蕙姨轉軚決志信主

68歲的「靚聲王」張偉文於4年前因腰椎病不良於行要坐輪椅代步，全靠歌手好友方俊（Aman）幫手負擔護老院支出及醫療費。之後張偉文為賺錢傍身決定再開騷，呢個逆境自強故事振奮人心，72歲的姚煒除咗出山做表演嘉賓外，日前仲帶埋張偉文跟黃夏蕙上查經班，希望集教友力量鼓勵到張偉文企返起身。採訪：方騫平

張偉文於本月20日起舉行3場《友情有義演唱會》，他知道有唔少觀眾撲飛支持自己，眼見票房反應熱烈心情大靚，目前積極練歌備戰，而且愈唱愈好，狀態回勇。

扶起張偉文練習行路
　　
擔任表演嘉賓的姚煒試圖向張偉文傳福音，藉住宗教力量令張偉文可以企返起身。姚煒日前車埋張偉文參加每星期一聚嘅查經午餐聚會，同場有黃夏蕙及教友們，姚煒除親自下廚外，又帶領弟兄姊妹為張偉文祈禱，之後還集合大家力量扶起張偉文練習行路，希望能慢慢訓練他腳力，將來能一步步行走。期間姚煒姐一度感動落淚：「我見方俊出錢出力咁照顧張偉文，真係好有情有義，所以我都想做返啲嘢，尤其張偉文咁後生啲歌又唱得咁好，咁快就唔行得覺得好可惜，希望用宗教去鼓勵佢。」張偉文感激說：「我都知道係冇可能企得起身，但係佢哋一番誠意幫我練習，感受到佢哋嘅愛同埋支持。」

另外，年年新年都撲去黃大仙廟上頭注香嘅夏蕙姨，近年亦活躍於教會，原來她受姚煒影響決志信主，當日亦為張偉文祈禱及唱聖詩，仲話要買演唱會飛支持，好搞笑。