Kai搵RV Wendy玩新歌CHALLENGE 笑金鐘國教健身勁多嘢講

韓國男團EXO成員Kai（金鐘仁）剛於上月尾推出第二張Solo專輯《Peaches》，近年韓國歌手出歌都好興搵歌手朋友玩新歌CHALLENGE，Kai都唔例外，搵嚟同門Red Velvet嘅Wendy一齊跳「Let's Pick Peaches」舞步，齊齊摘桃都幾好笑。

另外，Kai獲金鐘國邀請做其健身YouTube頻道嘉賓，原來兩人是用同一個健身室，成日見但唔會互相打擾，Kai提到健身有兩個原因，一係腰椎唔好，二係為咗跳舞，因為要好身材先可以更好地表現唔同風格嘅舞。

拍攝期間，金鐘國係咁講嘢，Kai忍唔住笑佢，話未見過佢咁多嘢講，前者表示一講起健身就停唔到，有時拍片講好多嘢，到剪輯嗰陣就算係咁剪都仲有好多。另外金鐘國又提到，唔好諗住用健身嚟醫腰骨痛，一定要去睇醫生，然後全段片就係講解做健身必須要注意嘅地方，想知多啲可撳入有關頻道睇吓。