張偉文永不放棄精神獲觀眾撐場 文化中心首場個唱宣告爆滿

68歲死過翻生嘅張偉文（Donald）近年不良於行要靠坐輪椅代步，喺疫情下停咗兩年冇開個唱坦言好唔開心，幸而近期喺有情有義嘅老友方俊（Aman）悉心照顧下，翻肥100磅，狀態回勇，因而喺今年12月20日、明年1月12日及14日分別喺香港文化中心、沙田大會堂及元朗劇院再開騷舉行《友情有義演唱會》。Donald逆境求生，永不放棄故事得到好多觀眾支持，經理人Aman宣佈好消息，指張偉文首場文化Show經已爆滿，沙田大會堂及元朗劇院場亦開始出現撲飛潮。

直播熱身相當精靈
由於Donald兩年冇開Show，Aman之前安排他做網上直播嚟熱身，當晚揀唱已故音樂大師黃霑作品，當Donald開腔演繹《風雲》、《親情》時，獲網民大讚唱功依然了得，畀心心及like力撐，為他打氣，雖然因為企唔穩曾經撞到腦出血影響到腦退化，但有歌唱，當晚Donald變得相當精靈，見網友叫他加油，他仲識講笑話回應：「我已經有好多油唱，唱歌係我最開心嘅一件事！」對於被讚他寶刀未老，Donald亦即反駁道：「老咪省吓把刀囉！」當晚Donald跟Aman及發燒女歌手方文(Astor)唱足兩粒鐘，Donald未見疲態，愈唱愈開心，而Aman演繹呂方《普通人》都帶出驚喜，網民留言話正，相當好聽。