張天賦獨居怪癖愛摸黑沖涼 林欣彤鍾情無聲生活

林欣彤（Mag）及張天賦（MC）獲邀擔任「黃Viu煲劇平台」《同煲同BLOW》第四集嘉賓，暢談各個大熱的韓國綜藝節目，並以「過來人」身份分享當年參加選秀節目的心路歷程。

Mag透露愛看韓綜《我獨自生活》：「我好鍾意透過節目睇吓韓國明星嘅屋企，有啲屋真係超靚，同埋有啲Artist一瞓醒就已經好靚仔靚女，仲記得其中有個明星一起身就曬太陽，要即刻戴副太陽眼鏡。」

至於MC因為家庭因素，早在16歲時已搬出來住，更自爆有獨居「怪癖」：「我其實做好多嘢都鍾意熄燈做，沖涼、食嘢都會熄燈，我好享受喺漆黑嘅環境中生活，感覺會自在啲，而且空間感都會大啲。」MC鍾情於「無光」下生活，至於Mag則喜歡長期靜音的「無聲」生活，她說：「我反而鍾意成間屋都靜得好緊要，有時我媽咪嚟到都睇唔過眼，叫我開吓電視、播吓歌。」

二人同為選秀節目入行，Mag對韓綜《LOUD》參賽者大表震憾：「參賽者大多都係10幾歲已經好勁，真係大開眼界，我喺到諗點解我細個唔係咁嘅？」提到她2010年參加《超級巨聲2》一炮而紅，她說：「其實當時唔係想靠呢個途徑入行，嗰時覺得做歌手嘅距離係極遠，只係有個朋友叫我參加就試吓玩啦。」

無心插柳柳成蔭的故事也適用於MC的入行經歷，憑《全民造星II》出道的他坦言：「我當時都係覺得出道做歌手呢件事係好遙遠，因為唔似見工咁有個正式途徑入行，當時心態純粹係玩吓，點知一步一步好好彩地入到行。」