洪嘉豪MC識於微時係時候了結 合作開騷預告宣布分手

洪嘉豪及MC張天賦作客TVB娛樂新聞台節目《StarTalk》，接受主播許文軒專訪，二人大談合作開騷感受。二人早在入行前已經認識，嘉豪說：「我哋係因為一個蘭桂坊酒吧騷而認識，第一眼見到佢，覺得佢係一個死𡃁仔，因為咁多個樂手當中佢年紀最細，好似個細佬咁，好記得佢戴反Cap帽。」嘉豪亦大爆MC經常有借無還，說：「佢成日借我啲嘢唔還，有筆、化妝品等，所以我有時會問佢有啲咩嘢唔要送畀我，好似之前有條褲佢唔要畀咗我，我都有出鏡着過，我咪當攞返佢啲便宜！」
MC則謂：「初初見到嘉豪嘅時候，第一印象唔係咁好，覺得有啲寸，後尾熟咗先發覺佢係咁樣同人相處。依家識耐咗，佢仲會不停咁試我底線，成日講一啲嘢嚟挑釁我，激到我差唔多想爆嘅時候，又氹番我，之後又繼續煩住我！真係好討厭！不過見佢彈鋼琴同好認真造音樂嘅時候，都好吸引！」

談到被網民打造成「賦豪CP」，二人一臉無奈，MC說：「我哋太Friend，所以平時喺公司同佢都幾親密，攬頭攬頸係好正常，點知有一次我熊抱佢兼聞佢件衫，畀公司同事影到仲放咗上網就瘋傳，就搞成咁，無啦啦撮合我哋！」嘉豪笑說：「我哋識咗7年！（有冇7年滋癢？） 有！所以係要有個了結！我哋有講過開騷時要宣布分手！」