张天赋独居怪癖爱摸黑冲凉 林欣彤锺情无声生活

林欣彤（Mag）及张天赋（MC）获邀担任「黄Viu煲剧平台」《同煲同BLOW》第四集嘉宾，畅谈各个大热的韩国综艺节目，并以「过来人」身份分享当年参加选秀节目的心路历程。

Mag透露爱看韩综《我独自生活》：「我好锺意透过节目睇吓韩国明星嘅屋企，有啲屋真系超靓，同埋有啲Artist一瞓醒就已经好靓仔靓女，仲记得其中有个明星一起身就晒太阳，要即刻戴副太阳眼镜。」

至于MC因为家庭因素，早在16岁时已搬出来住，更自爆有独居「怪癖」：「我其实做好多嘢都锺意熄灯做，冲凉、食嘢都会熄灯，我好享受喺漆黑嘅环境中生活，感觉会自在啲，而且空间感都会大啲。」MC锺情于「无光」下生活，至于Mag则喜欢长期静音的「无声」生活，她说：「我反而锺意成间屋都静得好紧要，有时我妈咪嚟到都睇唔过眼，叫我开吓电视、播吓歌。」

二人同为选秀节目入行，Mag对韩综《LOUD》参赛者大表震憾：「参赛者大多都系10几岁已经好劲，真系大开眼界，我喺到谂点解我细个唔系咁嘅？」提到她2010年参加《超级巨声2》一炮而红，她说：「其实当时唔系想靠呢个途径入行，嗰时觉得做歌手嘅距离系极远，只系有个朋友叫我参加就试吓玩啦。」

无心插柳柳成荫的故事也适用于MC的入行经历，凭《全民造星II》出道的他坦言：「我当时都系觉得出道做歌手呢件事系好遥远，因为唔似见工咁有个正式途径入行，当时心态纯粹系玩吓，点知一步一步好好彩地入到行。」