林欣彤燒着頭髮仍舉V自拍 蔣家旻鬧爆：黐線嚇死人咩

林欣彤（Mag）一向都好大頭蝦，25日在社交網自爆抹爐頭時忘記熄火，連髮尾被燒燶都好遲先發現，認真危險！

林欣彤上載一張髮尾被燒燶的相片，身後就開着火爐，她還興奮嘟嘴舉V留言：「我又燒燶咗啲頭髮。我成日都鍾意開咗火之後先嚟抺爐頭，又唔紥起啲頭髮啦～～抺抺吓就會聞到燒焦味～～咁就好驚啦～～然後即刻睇吓個煲入面啲嘢有冇事啦～冇事。咁就喺爐頭周圍搵有咩燒燶或者著火啦～～搵極都搵唔到。咁我就繼續煮啦～～經過一段時間之後，一照鏡，我就發現⋯⋯。」她自爆不是第一次發生，還問自己「到底仲會發生多幾多次呢？」。

Mag似乎完全唔識驚，但圈中朋友就被嚇個半死，蔣家旻留言鬧爆：「痴（黐）線！！！嚇死人咩！！！！！籌款節目表演，好彩無事。」Mag還開玩笑說：「我都算幾搏～請問今次善款數字係？？」陳慧敏、朱薰都吩咐她以後要小心，鍾舒漫亦說：「「No next time la.」Mag回覆：「我都希望冇」。