星島獨家丨毛舜筠月中再跟AL Edan拍戲 期待另一波互相偷拍圖

姜濤和柳應廷（Jer）接拍由彭秀慧執導的英皇電影《阿媽有咗第二個》，兩位影壇新人都話能夠跟影后毛舜筠（毛姐）合作學到好多嘢。同姜濤及Jer合作完，本月中，毛姐將再跟盧瀚霆（Anson Lo）和呂爵安（Edan）這對《大叔的愛》的「登神CP」合作拍新戲，可以連續同四位MIRROR成員合作，鏡粉們應該好羨慕毛姐。

毛姐一向好提攜後輩，拍攝《阿媽有咗第二個》時，便對戲中演她兒子的Jer 和姜濤照顧有加，又跟後生一輩互相偷影「瞓覺樣」，隔咗幾代的「互相傷害」好笑又有愛。

經過個多月拍攝，上月尾電影已煞科！煞科前，姜濤和毛舜筠在跑馬地拍攝一場在車上傾偈的場口，之後轉到銅鑼灣拍攝經理人毛姐和「明星」望住遠方談論日後發展，場口簡單，兩人交足戲，拍到半夜收工！

忙完《阿媽有咗第二個》，毛姐月中再投入另一劇組，今次對手同樣是MIRROR成員，就是人氣爆燈的「登神CP」Anson Lo和Edan。Anson Lo早前接受訪問時，曾透露將會接拍新片，有提及新角色︰「比較高冷型，較內向及情緒有少少問題，這些都是我未試過的角色，覺得好新鮮同興奮。」

知情人士透露：「Edan其實仲拍緊ViuTV劇集《i.SWIM》，不過劇組因為要就各演員的檔期，所以拍下停下，今個月中Edan就會劇集、電影兩邊走！」