姜濤多得隊友幫手捉實 完美擊中Anson Lo額頭

MIRROR 早前接受音樂平台訪問，訪問中更大玩「蒙著嘴大電視」，難得12子合體，眾人都變回大細路，玩得非常投入，笑料百出。他們分成兩隊「普通組」由Anson Lo (盧瀚霆) 做動作帶領 Alton (王智德) 、姜濤 、Ian(陳卓賢)、Tiger(邱傲然)、Frankie (陳瑞輝) ，而 「精英組」則由Edan (呂爵安) 做動作帶領Lokman (楊樂文)、Jeremy(李駿傑)、Jer (柳應廷)、Ak (江𤒹生)、Stanley(邱士縉)。

遊戲由「普通組」一隊先開始，Anson Lo 相當落力做動作，可惜隊友們完全估唔到，更一副嫌棄的樣子，笑指：「你講幾多個字先」、「你知唔知自己做緊乜」，最後AL一隊只得6分。反而Edan 帶領的「精英組」，實力相對厲害得多，其中要估「花姐」兩字，Edan 做出大肚腩手勢來形容，AK 秒速估中，Jeremy 即搞笑問：「點解花姐係咁嘅？」最後Edan一隊以15分勝出。

「普通組」一隊以大比數落敗，各隊員一致舉手投票由Anson Lo 接受大懲罰，再全員通過由同組隊員姜濤負責彈額頭。要接受大懲罰的AL 大表緊張，大嗌救命表示: 「你哋畀我心理準備下先 。」又叫Edan 唔好捉住佢塊面，接著又問姜濤 :「你知道係彈額頭架？你隻手可唔可以高少少。」在AL 扭扭擰擰下，姜濤狠心表示：「捉住佢隻手」，身邊隊友夾手夾腳捉住AL，在姜濤數3聲下完美擊中AL的額頭，姜濤更指，平時除咗練習唱歌跳舞，第3樣就係練彈額頭。

正當Tiger想話快啲再彈第2下時，他口快快說：「趁佢(AL)未紅..」AK即搶着說:「阿Lo 未紅？」Tiger 即刻解釋：「額頭未紅!」場面相當搞笑，彈完第2下，AL眼泛淚光，呆了幾秒，網民都紛紛留言表示心痛。落敗隊伍最後更要落力推介12子的口罩 ，姜濤表示：「每日根據你嘅心情，去用唔同嘅顏色」而被彈完的AL似乎仲未回魂，笑指：「做緊咩啊而家？」只簡單表示「好舒服！ 」 姜濤即刻借勢話：「咁嚟多次（彈額頭）……！」遊戲在歡笑聲中完結。