獨家丨林子傑演舞台劇唔使再食軟飯 Buber做侍應賺錢交租
2021-10-08 01:02 
一年前張紋嘉（Crystal）和男友林子傑(Ronald)喺ViuTV節目《調教你男友》中真情剖白，Crystal仲爆喊發表「軟飯論」支持男友，睇到觀眾好動容。好彩疫情過後，Ronald多返Job，本月22至24號於沙田大會堂演出5場舞台劇《Hello》，Crystal畀咗唔少意見。採訪：方騫平 攝影：沈健程
舞台劇《Hello》改編自藍橘子網上微小說《與女鬼的同居日常》，講市井打工仔阿杜死慳爛慳終於喺30歲前上到車，點知個單位除咗人住之外，同屋嘅仲有女鬼小善，最後仲發展成人鬼戀。《Hello》由林子傑、《全民造星III》嘅參賽者麥詠楠(Buber)擔當男女主角，以及演過電視劇《暖男爸爸》的李建邦。
Crystal畀好多意見
30歲前Buber終於改善到生活，由旺角劏房搬咗去住村屋，相對負擔大咗，所以疫情其間為咗交租走去做cafe侍應，今次係疫情過後做嘅第一個舞台劇。Ronald就比較好彩，去年靠《調教你男友》效應做KOL，至今年初都有做返舞台劇，雖然只坐得5成觀眾，但總算有工開，唔使「食軟飯」！他開心表示：「『前輩』(女友)有嚟睇我哋排戲，佢睇住我長大，而且好專業，唔介意我同Buber有親密戲份，仲會用觀眾角度畀好多意見，好似多咗第3隻眼咁。」導演唐浩翔話係好事，有時投入落去唔知有盲點；Buber未知舞台上會有幾親熱，交由導演話事。李建邦笑言其角色好重要，負責喺故事中穿插及剝花生。
最新回應