李佳芯成台前幕後民調「真人靚過上鏡」NO.1 麥美恩屈居第二

李思捷主持及監製的《思家大戰》在網絡多番引起熱議，繼之前陳豪成為一致公認的「人前人後都Nice」藝人後，本周日（10日）晚播出的第六集中，又有TVB台前幕後民調問答遊戲「講一個TVB真人靚過上鏡嘅女藝員」，答案如網民話齋「係人都估到啦」，榜首就是向來深得民心的李佳芯；而之後的排名，依次為麥美恩、朱千雪、陳凱琳、賴慰玲及林穎彤。

對於走性格路線的麥美恩勇奪第二名，且票數與Ali旗鼓相當，唔少網民大表驚訝，當事人麥美恩亦笑指收到大批朋友來電「食花生」：「我覺得個結果幾好吖，因為平時出街啲街坊或者喺出面做嘢啲人都會咁講。可能有咗呢個投票結果之後，我以後可以多啲信心唔化妝出鏡，哈哈！」

今集嘉賓有由何廣沛、江嘉敏、郭子豪、方紹聰、朱智賢組成的「喪B隊」，以及由袁偉豪、鄭詩君、陳自瑤、丁子朗、劉佩玥組成的「把關隊」。「喪B隊」自我介紹時被思捷取笑為癲喪，但原來只是「別人笑我太瘋癲」，「喪B隊」於第一條「初吻發生喺邊一度」的民調問題中，竟破了節目紀錄以首輪零答錯成績成功清版，思捷亦不禁驚呼：「真係未見！」一眾嘉賓之中，以江嘉敏最為語出驚人，她首先在爭奪回答權環節時向新上任的J2創意總監C君挑機：「你驚唔驚？知驚就好！」之後思捷問她「飛過幾多條仔」時，她再發表驚人言論謂：「數唔晒！」相當狂野兼玩得。

升呢後的C君未獲厚待，更多次被「擺上枱」，思捷都不忘揶揄其身份謂：「你覺得你嚟緊創意總監嘅工作，有啲咩新諗法？」向來轉數快的C君馬上以爛Gag化險為夷：「首先我可能會所有節目都係李思捷做先啦，我直頭想喺J2開一個節日，叫李思『節』！嗰日我哋一齊紀念佢。」思捷聞言即忍不住大叫：「啋！」場面爆笑。