【獨家】《大叔》帶挈首為動畫配音 Edan下期出糧六位數畀晒媽咪

雖然《大叔的愛》已播畢，但餘溫仍然厲害，Edan（呂爵安）和Anson Lo(盧瀚霆)的「牧田CP」獲不少品牌垂青，「田田」除拍賀歲片，更拍住陳欣妍首次為動畫《反轉方舟動物團》配音。Edan單喺今年上半年已因多方面接Job進帳6位數，更暫時贏Ian(陳卓賢)少少成為MIRROR「吸金王」季軍，僅次姜濤及Anson Lo。據知，Edan身價仲三級跳，廣告價已飈升到20萬！採訪：方騫平 攝影：譚壹致

「牧田CP」深受歡迎，呂爵安希望挾住人氣吸引觀眾入場睇他首套聲演的動畫《反轉方舟動物團》，片中Edan聲演10歲的貪玩長鼻獸菲尼，而陳欣妍(Shirley)就聲演黑面狐莉亞。

多懶音奇怪有得配音

最初聽到接咗配音job，Edan坦言好奇怪：「我出名多懶音，講嘢又螺脷，追問花姐有冇聽錯，係咪玩我呀？不過，做咗先啦！咪當作挑戰、嘗試同埋學習機會，最怕問多幾句唔要我。所以都有壓力怕會錄好耐，好彩有專業配音員督導，用咗兩日時間順利搞掂。」Shirley同樣係初試啼聲，她大讚Edan配得好生動鬼馬，反而她愈錄愈起勁時控制唔到手腳，而且keep住同一聲線都有啲難度。Shirley對Edan讚不絕口：「片中Edan既善良又勇敢，而且好有義氣，我都覺得有啲似佢，佢個人好樂觀，帶畀大家好多正能量，而且好有喜感，有幽默感嘅男仔唔會悶親人，隨時令到大家開心，呢啲男仔會加分！」

感恩多機會覺得奇蹟

憑《大叔的愛》爆紅嘅「田田」的廣告價由10萬升至20萬，知情人士爆料指Edan去年未爆紅時廣告價只收5萬，一年酬勞三級跳。有「田田」加持，Edan更險勝Ian成為MIRROR「吸金王」季軍。對此，24歲Edan冇否認，仲答得非常坦白：「希望係啦！我唔知佢哋(搵)幾多。不過都好感恩有咁多機會，最初都冇諗過會咁，只係想喺25歲做到啲成績出嚟，因為好多嘢冇得控制。我覺得一切係奇蹟嚟，運氣同實力，運氣係佔大多數，但運氣唔可以用一世，𠵱家努力提升實力。」語畢他抵死說：「我同AL『出巡』惹嚟哄動，只係因為有劇集加持，啲人好奇睇吓我哋乜料啫！」

記者追問一直恨送樓畀家人住嘅Edan，夠錢置業未？他即耍手話未夠：「邊得咁易(買樓)呀…好耐先出一次糧，下期出糧應該ok，好過以前嘅5位數，應該突破有6位數字收入(扣除成本及公司拆佣)，我會畀晒阿媽做儲蓄。」