【獨家】AK有份做嘉賓預佢搶風頭 鄧建明雷有輝開Show前操肌狀態大勇
2021-07-30 01:08 
太極樂隊將於8月7及8日假紅館舉行《Rainbow After Rain演唱會》，連日來5子積極備戰，而MIRROR成員AK就喺社交網開心自爆將會擔任太極演唱會7號晚嘅嘉賓，令唔少「生粉」撲飛入場「應援」。Joey Tang大讚AK既玩得又夠Rock，強調唔怕被搶風頭：「哈！佢離開咗個台，風頭又落喺我哋度！」採訪：方騫平 攝影：譚壹致 場地：Alive fitness HK @尖沙嘴喜利大廈
日前太極成員鄧建明（Joey Tang）及雷有輝（Patrick）約埋去健身中心加操，務求喺最fit狀態下演出，見兩人玩完對打拳擊，又喺指導下係咁操出手臂線條，狀態大勇。
鍾意AK成熟又好傾
Joey於3年前發現有脂肪肝，要的起心肝減肥，𠵱家成功踢走脂肪肝，健康理想。問到男人係咪著重狂操腰背部位嚟keep住力度？Pat哥大笑說：「最重要嘅事(傳宗接代)經已成功咗。」Joey就話操腳重要啲，係男性荷爾蒙及淋巴最多部位。Joey又說：「我唔鍾意做啲『衰嘢』，所以唔操腳！」講到拳擊對打，Joey仲自爆係rock友，試過喺Patrick飯局上飲咗支唔靚嘅酒同最靚仔嘅隊友(Ricky Chu)有推撞，殃及出手撞開嘅和事老Pat哥，不過大家鬧完就冇事，唔會傷兄弟情：「𠵱家rock嘢放喺枝結他度，搞到枝結他會著火！」而他請埋rock友AK喺7號晚演唱會一齊玩，Joey說：「佢好好傾，個人又成熟兼好玩，同埋聽佢首《黑之呼吸》好正，我哋預咗畀人搶風頭，Party梗有搶風頭朋友啦！」
最新回應