【IG Post過三萬Like】唱《ERROR自肥企画》主題曲 肥仔借MIRROR舞台跪地找數

《ERROR自肥企画》自上周播出後極受歡迎，阿Dee的「鳳凰不死鳥」笑爆觀眾，而首集播出，由起格導演Mike唱的主題曲《無制限OT編集團の行動綱領》被瘋狂洗版。肥仔之後出Post話只要IG有2萬like就會唱主題曲，眼見Like數來勢洶洶即淆底改口要3萬，3萬就3萬，話咁快就過，網民吹雞等找數。

今晚7點，有份幫MIRROR演唱會排舞的肥仔喺IG貼出找數片，見佢借MIRROR舞台唱出《無制限OT編集團の行動綱領》，半程彈彈跳最後仲跪埋地，最重要有燈光仲有live band非常認真。肥仔留言:「找數真漢子，橫掂都係自肥偷埋MIRROR個台嚟玩，多謝成隊band同我一齊玩，時間短無太多準備大家收住貨先。」原唱者Mike導演留言：「得顆心去為你無制限。」而MIRROR的Alton就話：「果然可恥，果然有用」至於隊友阿Dee就唔多欣賞，指原唱者完勝，仲同肥仔講Sorry。